شبه القمر

دلوقتى بس .... 
 أقدر اقول انى إنهزمت
وإنى بفراقك ضهرى فعلاً إنكسر
دلوقتى بس  ....
أنا دوقت إحساس إنحرمت
وعرفت معنى كلمة القلب إتعصر
بالحمد ودعت الحياة فى كلمتين
واخدت وياك العمل زاد السفر
الحمد لله كلمتين مش كلمتين
الحمد لله ...........
ده ختام اللى إنتصر ........
ودعتنا وشوفنا ف عيونك دمعتين
سلمت روحك للى أوجدها بقدر
طب كنت قولى الإبتسامة دى لمين .؟
ياللى إنت نايم ع السرير شبه القمر .!!
م أغضبشى ربى بأى كلمه ف وجعتى
ولا اقولشى غير إنا فى بعدك محزونون
سلمت لله بالرضا فى فجعتى
راجع لربك وإحنا حتماً راجعون
...............

والنيعمة ما بغشك .....

جبت الزواق بالدين
رايحين مقابلة سوا..
قومى اجهزى دا يومين
وهنطلعوا على الهوا
هنقابل الملايين ....
وابقى البسيلنا العلم
واما تقابلى حزين
متزوديش فى الكرم
متطبطبيش على حد
كفاية تسبيلة ....
ولو هيزعل حد ....
يتفلقوا بلا نيلة ...!!!
عايزك تقولى { نعم }
بس افردى وشك
وان كنتى حاسه بندم
والنيعمة ما بغشك .....

ولا تفرق .....

جانا الشتا وفى الشتا زعبيب ورعد وبرق
نونو صحيح انما غربلها غرب وشرق
وناس بترقص هنا وناس فى ايدها الرق
وناس تقول النعم وناسيه كلمة لاء
وناس قتلها العشم وناس قتلها النق
وناس بفعل الغشم زنقونا جوه الشق
جانا الشتا وفى الشتا زعبيب ورعد وبرق
مش ناقصة يعنى الفتى من خلق عايزة الحرق
من خلق متكلفته مش حاسة يعنى بحد
خايفه يصيبها الشتا ينهك لها الصحة
ويهزها هزة جامدة تضر مصالحها
ماسكين فى دنيا زوال مادامتش مره لحد
ولحد ما يوصلوا بيطاطوا سبت وحد
فاهمين طريق الامان هو الغنى والمال
ناسيين حقوق الغلابة ومضيقين ع العيال
وعيالنا متنورة وواخده ع الترحال
وهيسخطوك يا قرد عمرك ما تبقى غزال
هنخافوا ليه م الجاى ربك ما يظلمشى
مش فارقه نقعد كما مش فارقه لو نمشى
احنا العرق رزقنا وف اى حته ندوس
ولا نعرف النسونة ولا النفاق والبوس
ولا نطلبوا م العبد ولا نحنى له راسنا
ونطلبوا حقنا م القطر ولو داسنا
وطول ما فينا نفس مرفوعه اهى راسنا
وكل واحد ظلم هيجيلوا وقت حساب
فى الآخره يسكن نار فى الدنيا ليه مداسنا
ايام شبه ايام وبردو بتعدى ولا عمرنا هننضام
ولا قلبنا يصدى ...........
واللى يخاف حد غيرنا احنا مانخافشى
مش فارقه نقعد كما مش فارقه لو نمشى
........................................................

دعا الملايين ..........

نجم ...........
 خلاص هتروح ....
اخدت معاك دعا الملايين 
وسلمت البدن والروح .......
وسبتلنا هنا ورقك واقلامك وعشاقك
وسبتلنا الوطن مجروح .....
وسبتلنا الاهات وبواقى اشواقك
لناس مش عارفه فين هتروح
وسبتلنا غناوى لبكره ننشدها ...
فى عز القهر لو حتى بصوت مبحوح
وسبتلنا كلام الفخر والعزة
دوا يشفى بلد مدبوح .....
وسبتلنا بيبان ندخلها من غيرك
وشباك ع الامل مفتوح
..............
  

يا بنت النجم ..........

يابنت النجم يانوارة ما تخافى
هتفضلى غالية زى النجم تتشافى
لا ايد ظالم هتوصلك
ولا فلولهم فى يوم تملك
تمس شعرة من راسك
وتجرح قلبك الصافى
ف قولى زى ما تقولى ولا تخافى
وارمى حمولك الاتقل على كتافى
انا مصر اللى بتحبك 
انا نبضك ... انا امك
وانتى بنتى مهما يحاولوا يغيروا اوصافك واوصافى
عزائى ليكى ف ابوكى مهوش كافى
عشان احمد حبيب  قلبى كان النور اللى باقي لى
عشان احمد كان الكلمه كان الحكمه ف مواويلى
عشان احمد كما .......... نيلى ....
شرب منه الجميع ولا.... كل ....
شقى لجلى وعمره ما ... مل .... 
حفر مليون طريق........ ليا ....
وثار والثورة هيا ....... الحل ......

( بره ولد ). الى السفير التركى بالقاهرة. حسين عوني بوطصالي

بره ولد اخلع وفلسع م البلد
ماعادش حد يحبكم ولا حد طايق وشكم
يا كماله الناس بالعدد
متأسدين على مين يا اصناف النعام
يامدعين الحمشنة وكلام ما جابش غير كلام
مصر العظيمة بشعبها 
عارفة اللى عابها وعارفة مين بيحبها
بره ياعونى وخد معاك كل العدا
كل اللى كان على مصر نازل ودوده
وامانه يوم توصل لبلدك قولهم
ما ترجعونى تانى مره لأرضهم
مش ناقصة طرد وفرهدة
علشان فى مصر رجال ماتعرفش الهوان
ولا يكرهوا قد النفاق والنمردة

زينة ...........

زينة .......
 يازينة البنات
 يانن عين قلبى ........
 ياشمس كات فى البلاد غابت ومن بدرى 
قدرك مفيش حد يقدر ينجا م الأقدار 
والخاين اللى غدر
داخل اكيد النار ...............
وانتى فى جنة خلد ويا النبى العدنان
مش جنة واحدة يازينة الجنة فيها جنان
فى ناس بتبكى عليكى وتشكى من حالك
مين اللى يزعل وعارف ان النبى جارك
مش زينة فينا الذبيحة اللى اندبح احنا
احنا اللى سبنا الديابة
 تنهش فى جوارحنا ......!
احنا اللى كله كلام ف كلام 
وما ارتحنا ...........!
ووزرا عاجزة ورؤسا غاوية تفضحنا
وشعب دافس دماغه ف قلب طين الأرض
مادام بعيد عننا بننسى دم ...... وعرض
من النهاردة انتى بنتى بالحرقة والأحساس
حقك يازينة ف رقبتى ورقاب جميع الناس
.................................................................