تقول له ايه.......

كان نفسى اقابله
حتى لو لخمس دقايق
كان نفسى أواجهه
بنص أو ربع الحقايق
كان نفسى يسمع رأيى فيه
منى أنا.......
مش م الحدادى والحدايق
ربك حكم ... قدّر قدر
وف ليلة كان الله أمر
بصيت لقيتنى فى سكته
هبّا ف دقايق...........
فناديت عليه ورفعت منديلى ف إيدى
قال مين...؟
فقولت ياعم انا
مجدى الصعيدى
قربت منه الخطوتين
فيه إيه...؟
فقولت أنا
كلمتين...
قال: قول
فقولت له أولا
إن كان فيه حاجة عند كلب تخصك إنته
تقول له إيه......؟
قالى:هقول له أكيد يا سيدى
رديت وقولت: أسمع يا سيدى
وقعدت أحكى وأزيد وأعيد انا فى الكلام
وحكيت له على كل اللىّ فيّا واللىّ فيهم
واللىّ فيها م المشاكل والمصاعب والآلام
وغريبة شوفتة سامعنى رغم المسئولية بإهتمام
فجأه لقيتنى رافع المنديل
وقاعد ع الحصير
الله يجازى أم العيال
فتحت عليّا النور فضيعت المنام
وقالت لىّ قوم بتنام كتير
الساعة سبعة بالتمام
وصرخت إيه
طب أقول لصاحب الورشة إيه
إتأخرت ليه
قالت: صحيح
لما المعلم يسألك هتقول له إيه
أنا قولت :طبعا مش هقول
قالت:خلاص
قوم كلمه واستسمحه لجل العيال
محتاجه لقمة وهدمتين
والبنت عايزة كشكولين
والواد بقى له جمعتين
طالب نجيبله مثلثين
وإيجارنا والبقال ودّين أم حسين
والخضرى والعطار وقسط المفرشين
وقماشتك الترجال وجلابيه ياسين
فجريت على الورشة
قابلنى معلمى
قال: كنت فين...؟
أنا قولت له:أصل الحكاية فى المنام
ودة شىْ حقيقى مش بإيدى
قال لى : منام........!
آحكيلى يلا قوام عليه
أنا قولت له
أسمع يا سيدى...

القاهرة
2009