أغمق لون: 2010

الأحد، 4 يوليو 2010

سؤال جوايا .....؟

هتزعل لو قالولك مات .....؟
سؤال جوايا ليه اجابة
لكنى نفسى اسمعها
من العامة وم الخاصة
من الكامل وم الكاملة
من الناقص وم الناقصة
من الصادق وابو لامعة
ومن كى جى وان للجامعة....
اجابة نفسى اسمعها
من الكرما وم البخلا
من الجهلا وم العلما
وم العاقلين وم البلها
من السفهه وم النبها
من الحرامية والشرفا ....
اجابة نفسى اسمعها
من الشغالة والعاطلين
وم الرجالة والنساوين
من اللىّ اسمة سعادة البيه
وم اللىّ اسمة هباب الطين
من اللىّ حط جوه البنك
وم اللىّ حط فى نفسة
شهور وسنين....
اجابة نفسى اسمعها
من الأبيض وم الأسمر
من الراجل وم المنظر
وم المساجين وم العسكر
من الرخمين وم السكر
من اللىّ بيسكنوا فى دريم
وم اللىّ ف حارة فى الأزهر....
هتزعل لو قالولك مات ...؟
اجابة نفسى اسمعها
من الواقف وم القاعد
من النجم ومن الصاعد
وم المخلص وم الجاحد
من اللى ف غربتة وفاكر
وم اللىّ ف حضننا وباعد....
اجابة نفسى اسمعها
من اللىّ ماشى دوغرى سليم
وم السليكة والماكرة
من اللىّ دعا لرب كريم
وم اللىّ بيشربوا الخمرة
من الشعرا اللىّ فى الأقاليم
وشعرا لوازم السهرة....
هتزعل لو قالولك مات...؟
سؤال جوايا ليه اجابة
لكنى نفسى اسمعها
من الراكب وم المركوب
من الخاين وم المحبوب
وم الضايعة وم المحلوب
ومن رقاصة مقتنعة
ومن رقاصة عايزة تتوب....
اجابة نفسى اسمعها
من الحارس وم المحروس
من الفارس وم المفروس
وم الفلحوسة والفلحوس
من اللىّ طلع ما تعرف ليه
وم اللىّ نزل على الجزمة
وقال له أبوس....
اجابة نفسى اسمعها
من الأطفال وم العواجيز
من الأحرار وم الأراجيز
وم المحظوظة والمحاظيظ
من اللىّ عاش ف حاله وبس
وم اللىّ عاشها بالمهاميز.....
هتزعل لو قالولك مات ...؟
سؤال جوايا ليه اجابة
لكنى نفسى اسمعها
من الخايفين وم الشجعان
من اللىّ يهين وم اللىّ اتهان
من الطيب وم التعبان
من اللىّ أكل لحد ما مات
وم اللىّ مات وهو جعان....
اجابة نفسى اسمعها
ومن غير كدب ولا حركات
هتزعل لو قالولك مات ....؟

الأسكندرية
2010

السبت، 3 يوليو 2010

الخالد ..خالد...

خالد سعيد...
كان هو ده اسم الولد
قبل الممات.......
كات صورتة حلوة منورة
والحلم طالل من عنيه
وصحيح ما كنتش اعرفه
ولا كان ما بينا ذكريات
لكنى عارف انه مات مظلوم
وضاع حقه عليه....
(خالد حزين)
بقى هو ده اسم الولد
بعد الممات......
والصورة زرقا مشوهة
والقتل كان واضح عليه
خالد حزين......
نايم ف قبرة بيشتكى
وبينتظر يوم القصاص
خالد خلاص.....
مشى م الحياة
ولا عادشى ليه راجعة خلاص
ساب الحياة للىّ سرق
واللىّ نهب واللىّ اغتصب
واللىّ سحل واللىّ ضرب
واللىّ فى موته كان سبب
واللىّ من التهمة هرب
واللىّ على راس الكرامة
بجزمة داس
خالد خلاص........
لبس الكفن ....
مات واندفن.....
واللىّ قتل حر وطليق
خالد غريق....
فى بحر ظلم وافتراء
مظلوم وايه...!!!!!!!
(مقتول وقالوا قتيل ايديه)..!!!!
وقتيل ايديه اياك ف يوم تزعل عليه
خالد وذاق من مركم من غدركم
ولا نفعوا دمع الناس
ولا عذابوا الكبير
خالد وذاق......
مين بعد خالد جاى عليه الدور
فى العناء..؟
مين بعد خالد راح يواجهه يا وطن
نفس المصير..؟
خالد برىء......
من كذبكم من ظلمكم
ساكن فى قبرة بفعلكم
واللىّ قتل حر وطليق
خالد فى ضيق.....
مستنى حقه يا وطن
امتى تجيب حق البرىء.؟
واحنا فى ضيق
مين بعد خالد يوم يآمن
يمشى آآمن فى طريق.....

الاسكندرية
2010

الجمعة، 18 يونيو 2010

إش إش ...

إش إش .....
إش إش .....
كبرتى وصبح ليكى وش ..!

لاء وليكى ايد طويلة
لاء وطايلة كل عيلة
أرض جو وبحر دايسة
واخده كل الخلق شيلة
بالعه حق الناس بغش ....

إش إش .....
إش إش .....
كبرتى وصبح ليكى وش ..!

كبرتى وصبح ليكى صوت
واحنا عاشقين السكوت
حق إيه ياخى ...طق موت
ف الجرايد والأذاعة
وع الفضا وف كل دش...

إش إش .....
إش إش .....
كبرتى وصبح ليكى وش ..!

من ميلادنا وانتى عاملة
الف تهمة ( جريمة كاملة )
نشتكى منك تزوغى
زى أبرة ف وسط قش....

إش إش .....
إش إش .....
كبرتى وصبح ليكى وش..!

تخافى ليه ومن مين تخافى
كلهم نوم العوافى
وإن لقيتى حد صاحى
هتلاقيه إنسان جزافى
بس تسمعى ليه وليش...

إش إش .....
إش إش .....
كبرتى وصبح ليكى وش...!

قالوا مركبنا اللىّ رايحة
شايلة أكل وشايلة ميه
وانتى ليه ف الخلق طايحة
فاسدة فاجرة ومفترية
وعملت إيه أمريكا ديه
اللىّ ليها ألف وش ...

إش إش .....
إش إش .....
كبرنا وصبح لينا كرش ..!!

لاء ولينا معدة واسعة
ع الحرام دايماً بتسعى
لا ابن سبعة ولا ابن تسعة
كلنا منظر وفش....

إش إش .....
إش إش .....
كبرنا وصبح لينا كرش ..!!

كبرنا وطلعنا لفوق
عملنا زايد والشروق
زرعنا...... توشكى
يابنى فوق بطيخكوا أبيض
طعمه مش...

إش إش .....
إش إش .....
كبرنا وصبح لينا كرش ..!!

كبرنا وعملنا إجتماع
وكل واحد ليه دراع
إشمعنى رأيك يا بتاع
انا رأيى غيره ما يتفهمش ...

إش إش .....
إش إش .....
كبرنا وصبح لينا كرش..!!

كبرنا ورصفنا الرصيف
رخصنا توك توك للكفيف
ركبنا توحه والشريف
خلينا كل الناس تنش ...

إش إش .....
اش إش .....
كبرنا وصبح لينا كرش ..!!

كبرنا للناس العزاز
وعملنا سور وجدار فولاذ
وفرحنا بفريقنا اللىّ فاز
وطبخنا ضانى برام وشيش ....

إش إش .....
إش إش .....
كبرتوا حش يا بغل حش....

القاهرة
2010

الجمعة، 11 يونيو 2010

هيلا هوب .....

هيلا هوب...
هيلا هوب...
خطوتين وخلاص هتطلع
شد يابنى انته وهو
شدو تانى كمان بقوة
يعنى خلىّ ليكوا قلب
هيلا هوب...
هيلا هوب...
طالعه اهيه اهى راسها بانت
وادى ايدها شدو تانى
طلعوها خلاص دى داخت
ليه تسيبوها كتير تعانى
فيها ايه اتخدعت ف حب
هيلا هوب ...
هيلا هوب...
ايوة قفلت ياما بابها
ف وشنا وخسرت صحابها
ايوة كرهت يوم حبيبها
واللىّ أخلص واللىّ صانها
ايوة عشقت ندل هانها
بس ده مش داعى لينا
نسيبها وحدها فى اكتئابها
انتوا ايه ملكمش قلب
هيلا هوب...
هيلا هوب...
خرجوها من مرارها
حرروها من آلامها
خلصوها من جراحها
وم اللىّ باعها واللىّ خانها
واللىّ شربها العذاب
فناطيس بشوب
هيلا هوب...
هيلا هوب...
وإعملوا الخير للنهاية
ولا جايز دى البداية
والله ما تفرق معاكم
أو معايا......
لو نموت وتعيش قوية
لو تعدى الأزمة ديه
حتى لو صبوا عذابهم فوق دماغنا
صب .....صب
يبقى ضحينا ونولنا
لجل امنا تفتكرنا
إحنا لينا حد غيرها
هيه ليها حد غيرنا
طب نضحى لمين يارب
هيلا هوب...
هيلا هوب...
شدوا تانى بكل قوة
يلا يابنى انته وهو
خرجوها من مرارها
حرروها من آلامها
خلصوها من جراحها
وم اللىّ باعها واللىّ خانها
أمكم مش ناقصة غلب
هيلا هوب ...
هيلا هوب.....

القاهرة
2010

الخميس، 10 يونيو 2010

وشوش.....

قامت قيامة الأرض
والبحر والحكومات
طلعت فى كل البلاد
الخلق فى مظاهرات
وناس تندد هنا
واستدعا فى السفارات
وناس تهدد هناك
ويقولوا فيه مؤامرات
وطلعوا ناس ف الدش
على الفضائيات
بيلعنوا فى الغش
وف الضمير اللىّ مات
... إزااااى ...!!!!
إزاى يهاجموا السفن
الجاية لجل تحوش
وإزاى نسا واطفال
عزّل يواجهوا جيوش
وساكتة ليه العرب
والغرب ليه م تحوش
سفن اللعب تنضرب...!
فين الحقوق يا وحوش...؟ !
وبعد قوم القيامة ...
ولبس ناس لوشوش
دفنا راسنا نعامة...!
ونزلنا ليه على فاشوش....

القاهرة
2010

الخميس، 29 أبريل 2010

أيمن..........

أيمن.....

فى وقت فراقنا مش حلوة الحياة دايماً

ومش سهل أنى ألاقى أحباب

ومش سهل إن نتلاقى......

ده كل ما تتفتح طاقة

ألاقى وراها ألفين باب...!

وميت معلش تبعدنا .....

وآخر شوقنا بكا وعذاب

تعدى شهور وتوعدنا

ونستنى لقا الأحباب

يفوت العمر وميعاد اللقا يبعد

وترجع تانى ياض توعد

ونستنى يدق الباب وما تجيشى

وما تجيش........

يا حبيب قلبى

ولا تقول حتى ايه الأسباب

وعارف...............

كل ما بسلم عليك فى رسالة بتألم

لأنى بحس بالغربة وببعادك

وبالساعة اللىّ بتقدم

وعمرى اللىّ إتسرق منى

ف جرى ورا أمل كداب

ولما العمر يتقدم بنتقدم من الحفرة

وخطوة ف خطوة نسكنها

وغيرنا يحط فوقنا تراب......

فما تصدقش من قال لك ف يوم طنش

تعيش مبسوط تطنش إيه

وكل دقيقة بتعدى

تقربنا يا واد م الموت

تقربنا من الآخرة

وفى الآخرة لابد حساب.........

ويوم العرض نتحاسب

على الحلوة ...........

وع المرة ...............

على الكلمة اللىّ كات طالعة

على الفكرة اللىّ كات داخلة

على السايب وع المربوط

على الدافع وع الأسباب

ويوم العرض .........

لو حتى ابن مين ما يفوت

ولا يوم يتعملوا حساب.....

القاهرة

2010

الجمعة، 5 مارس 2010

مناشير........

مناشير.....

نازلين واكلين طالعين واكلين

عايشين بالفبركة والتفانين

راكبين فوق صدرنا خنقنا

ونروح م القلب الاسود فين

تعابين.....

من آخر صف هناك جايين

واصلين للأول بالأسافين

على كلمة وخطوة مراقبينا

وبكل دمار ومرار جاهزين

شياطين.....

وف كل طريق واقفين قاعدين

تيجى حتى شمال تيجى حتى يمين

حسبينها بسنتى وشايفنا

بنغوص فى الوحل ومش سألين

ناكرين.....

ولا راعم فينا لا ذمة ودين

ولا رحموا كبير ولا حتى جنين

ولا فكروا قالوا دى ناس منا

ولا بعد عذابهم قالوا آسفين

وسنين.....

بتشيلنا سنين وتحط سنين

وغيلان فى الشكل كابنى آدمين

عاملين اخواتنا وحبايبنا

ويقطعوا لحمنا بالقوانين

وكتير.....

عارفين الحق لكن خايفين

شايفين الظلم ومش قادرين

وف قلب النار نايمين ننا

والذل غطاها كما البطاطين

خالعين.....

على فين رايحين على فين

وبلدنا عروسة نسيبها لمين

الكل مهاجر فيه إنّ

قالوا إنتّ ايه دى عروسة كمين

والبير.....

يبلع فى الحلم ومش حالمين

وهنحلم ليه كلنا فاهمين

ده حلمنا وحتى إن ما حلمنا

ما فى فايدة خلاص ماحناش حالمين

سكاكين.....

بالعدل موزعة ع المساكين

مرشوقة ف إيد وقلوب ملايين

والدم خلاص عملوه حنة

يدهنوا بيها رجل المنتفعين

من مين.....

رح ناخد حق الناس من مين

والناس مدبوحة عشان رغفين

والواد على صرخة منيمنا

وبيصحى عليها وادينا عايشين

سلاطين.....

وملوك أمراء رؤساء حلوين

عاملين فيها ألف صلاح الدين

والقبلة الأولى ضاعت منا

وجنابهم عاملين مش عارفين

ناسيين.....

والعمر ف لحظة تمر سنين

مخلوق من طين هيعود للطين

ويإم هيدخل فى الجنة

ويإم ف نار وعذاب وأنين....

القاهرة

2010

الخميس، 25 فبراير 2010

واقفه مايصة ......

النهاردة لمحت صورة للبطولة
خلق واقفه ناس بتهتف
ناس تندد ناس تهدد
ناس جسورة.....
قمت سائل واد معدى
قولى وحياتك يا فندى
البشر دى واقفة ليه... ؟
قالى ابدا يابن عمى
خلق محبوسة ف خوفها
مهما تصرخ......
مين هيسمع مين يشوفها
واقفه عندك واقفه عندى
واقفه دايماً مش جديد
قولت ايوة يعنى بعد الواقفة عيد
يعنى فيه فتّة ولحمة
يعنى فيه حمّر وطش
قالى يابا انتة بتحلم
لسة زى ما هيه مش
واقفة عندك واقفة عندى
واقفة تخزى بيها مرة سنين كسوفها
واقفة يمكن لو تشوفها ....
تقول خلاص دا ما عدشى غش
قولت ماشى ........
بس بعد الواقفة ايه.... ؟
قالى فش....... !!!
يعنى منظر يعنى صورة
كلمتين وقوام بسرعة
هش ياض ويابت هش
ترجع المركب لسيرها
والبواسل يعكسوا الدفا لغيرها
تبقى مركبنا اللىّ ماشية
ماشية مش عارفة نهار دة ولا ليلها
تايهة جوة الموج تعافر
والغرق اصبح مصيرها
واللىّ عامل فيها راجل
مرة واحدة قوام يكش
هش ياض ويابت هش
رجعت المركب لسيرها
والقلوب اللىّ زمان ماتت ضميرها
برضه رجعت بالمحايلة لخط سيرها
يعنى رجعت للنعومة وللمسايسة
يعنى راحت كل واصفة ف المقايسة
يعنى شاخت أمنا وفى الضلمة حايسة
واللىّ وقفوا وقالوا لاء بقلب جامد
وقفوا قعدوا مهما عملوا خلق مايصة
والبشر اللىّ افتكرها بشر جسورة
طلعوا زى ما قالى صورة
طب وقفتوا الواقفه ليه... ؟
طب وبعد الواقفه ايه ... ؟
واقفه ايه دى اللىّ آخرها الناس تكش
وتقولولى عيال جسورة
م افتكرش ........ !!
رد واحد م البواسل
قال عايزنا ف زيت نطش
خش انته ياعم وحدك
طش ضهر وطش وش
واحنا سبنا الواقفه بعدك
هش ياض ويابت هش .....

القاهرة
2010

البحّار......

أخويا ياساكن م بين البحور
يابحّار وهايم بمركب تدور
على كل مينا ومرسى ومدينة
توزع ف شوقك كأنة نذور

وسايب ف قلبى جراح الفراق
وحابب غيابك ونار لشتياق
وآخرة فراقك تجينى فى ليلة
يادوب هيه ليلة ويعود الفراق

تبحر وبحرك يشيّب شباب
تخاطر يا اخويا ف قلب الصعاب
تلف الموانى وحلمك بسيط
وأرضك بتجرى وسقفك سحاب

م ترجع وحقق ما تحلم معانا
جرحنا بعادك وجرّح هوانا
شبعنا وداعك كفاك إغتراب
ولو شوقنا ينطق هتنزف دمانا

وفارق معانا وجودك بعيد
تصدق اقولك وجودك ده عيد
مش انته الصغير وفرحة ابويا
مش انتة اخويا وحبيبى الوحيد

وقالوا ده جاى ده قال بعد يوم
وفاتت ليالى ولسة الهموم
وغالى ياض انتة وفرح السنين
ولولا الملامة اجيلك وعوم

بعتلك سلامى وجودى وياسين
بيهدوا التحية ويهدوا الحنين
وماما وبابا بيدعوا تجيلنا
بفرحة ونصرة نأمن آميين

وصلى على طه خير الأنام
صحابك بيهدوك كتير السلام
وزوجتك واختك وكل الحبايب
بيدعولك انتة بأحلى الكلام

يا نور الفنارة يا شدّة قلوع
ياساكن بهلبك ف وسط الضلوع
بحبك ...بحبك .. واحلف ب ربى
ختمت القصيدة عشان الدموع .....

القاهرة
2010

الجمعة، 12 فبراير 2010

المرايا.......

النهاردة بطل طلة فى المرايا
ف إنتبهت....
ده شعرى شاب.......!!!
عدا عمرى وألف حسرة عليك ياعمرى
وع الشباب.............
شيلت حزنى ف قلب قلبى وروحت خارج
روحت أصلى الجمعة وادعى
ع الديابة والزنادقة والخوارج
مش حزين على شعرى لبيض
الألم من عمر رايح
ياما قالوا بكرة تفرح.........
بكرة جاب بكرة وكتر م الفضايح
وف صلاة الجمعة كان الكل قاعد
والسكوت مالى المكان
لحظة شوفت إمامنا صاعد
منبرة رُفع الآذان..........
واما تم آذانا قام وابتدى الشيخ الكلام
وامتدح فى كل فرد من الديابة
امتدح كل الزنادقة والعصابة والخوارج
قومت خارج.........!!
روحت اصلى ف حتة تانية
شيخها مايكونشى برتبة أولعُبان
روحت حىّ بعيد كمان.......
بين جموع الناس قعدت فى حالى ساكت
خطبة كانت زى غيرها.......
عن ولاة الأمر اصحاب الجواكت
دول فادونا ودلعونا دول حمونا من المهالك
قومت قايم تانى ساكت......!
قولت أبعد عن شارعهم ألف شارع
روحت جامع شكلة ان امامة بارع
قول قعدت خمس دقايق
قول فهمت الخطبة دايرة
ع المساندة وع المناصرة
عن حاضرنا وعن ماضينا
قولت جوة نفسى تسقط
كل دولة تسيىْ لاسلامنا ونبينا
كمل الشيخ الكلام........!!!
المساندة للفريق القومى مش علشان نبينا
قولت خيبة وألف حسرة على اللىّ صابنا
واللىّ فينا..............
قومت قايم تانى ماشى فى المدينة
كل م ادخل لجل ما اسمع خطبة ألقى
اللىّ فيها مش اللىّ فينا
ناس تؤيد ناس تمجد
ناس بتمدح ناس تهدد
{ أوع حد يكون بيحمل للحكومة أى أحقاد أو ضغينة }
قولت ارجع للمرايا
بطل طلة م التقيت فى شعرى شعرة واحدة سودا
كله ابيض.......!!!!
قولت يعنى العمر عدا بدون إفادة ولا إستفادة
قولت يعنى العمر عدا بدون سعادة
عدا زى قلم بيجرى ع الورق وبكل يسر
جانى هاتف...دق قلبى
سمعت صوت بيقولى أبداً
لسة بدرى ............
وان ما كان لينا لولادنا
قوم بقى استغفر وصلى
إن بعد العسر يسر
إن بعد العسر يسر........

القاهرة
2010

فرق شاسع.......

فرق شاسع..............
بين حديد السيف وحديد الجدار
بين سلام القوة وسلام لنكسار
بين دموع الغاز ودموع لنتصار
بين بلاد الظلم وبلاد العمار
بين بذور الورد وبذور الدمار
بين نهار فى نهار وبين الليل نهار
فرق شاسع.................
بين عواء الذئب ومواء القطط
بين كلام الجد وكلام العبط
بين شعوب عايشة فى خيرها وبين شعوب بالعة الزلط
بين محبة فى صدورنا وبين محبة على اليفط
بين خرج يعمل مظاهرة وبين جابوه لما شبط
بين وقعت ف شر عملك وبين وقعت بدون غلط
فرق شاسع.................
بين نباح الكلب وزئير الأسد
بين ولاد الغرب وولاد البلد
بين شهيد الحرب وشهيد الكمد
بين كلام لبناء وكلام للهدد
بين جموع الحق وكماله العدد
بين سلامتك يا زعيمنا ...!!
وبين سلامتك يا بلد..........
فرق شاسع............
فرق شاسع........

القاهرة
2010

الخميس، 11 فبراير 2010

حققت أحلامى....

خلاص حققت احلامى
أخيرأً جبت أنبوبة
تعبت كتير فى ايامى
ومش هحلم خلاص توبه
مانيش طالب من البهوات
غير انها تكفى نص الشهر
وتعمل شاى خمس مرات
وترحمنى اسبوعين م القهر
وايه يعنى بقت غالية
م طول العمر مدعومة
وبرضة اخوتنا فى { ناتانيا }
ليهم فى القومة والنومة
نقومها هنا شوية
ننيمها هناك نومة
نولعها هنا ف ثانية
بلاش من طشة التومة
سيبونا نخفف المعناة
على اخواتكم فى { تل ابيب }
ونبعت غازنا للمواساه
يعزونا ف شهيد انابيب
تدوم الألُفة والعشره
عدو الأمس يبقى حبيب.!!
ونبصم ليكو بالعشرة
ما يدخل بينا اى غريب
وكله يهون عشان مصرك
وبكرة هيرخص البوتاجاز
بلاش تنسى قوام أصلك
وإرجع للباجور أبو جاز
ومتبصش على غيرك
دى ناس محتاجة لمساعدة
خلاص يعنى ما فيش غيرك
قوم إقرا كتاب عن الوحدة
هتعرف إن دة مشروط
وحق طبيعى ومعاهدة
هتعمل فيها واد فلوط
قابلنى ان خدت يوم واحدة
أقف ساكت ف قلب طابور
ومد إيديك وإشحتها
يا إم اسرق يجيلك دور
تركيبها بغلوتها....
وفوضك م الطريق لإيلات
ماسورة غازنا مرغوبة
سلاما ع اللىّ عدا وفات
ياعم بلاها ...انبوبة...

القاهرة
2010

يدوم العز....

فرجت ياواد هتهيّص
على بابا باع الكنز
افتح بقى البلاليص
وادعى يدوم ( العز)
مصر النهاردة آمان
والمستخبى اهو بان
ونباشين القبور
هيركبوهم بنز..!
عندك ياحاج فيه كانز ؟
لا عندى راس رمسيس
وقط شكله جنان
اسود سواده فطيس
ومشط رع وهامان
توابت وموميا هاميس
جرانيت عقيق مرجان
دهب ياقوت ورخيص
بردى ومن أزمان
وفسيفساء فسافيس
نقوشات جميع للوان
كوبرا كباش نسانيس
معروضة فى الدكان
ولا قفل ولا ترابيس
لاخريطة ولا طيران
ولا فوج ولا اتوبيس
ولا خيمة ولا كرفان
ولا بسبسة وتأليس
ولا بهدله لأسوان
كله هنا ف قراطيس
بعنا بصلاة النبى
للىّ دفع بدولار
للعربى والأجنبى
حاجة اصلى مش تذكار
والشعب فين والنبى ؟
الشعب !!!!
موووووووووت ياحمار
مشغول بجدو وزكى
وتصريحات سعدان
ومين سبب ضربنا
فى موقعة درمان
ومين لعن أمنا
وداس علمنا كمان
شغلوكى يا مصرنا
شغلونا بالالحان
دقوا طبول حربنا
لجل العيال دى تبان
وبعد بيع التاريخ
وموافقه البرلمان
على قانون الكلى
والفشة والعصبان
طالع قانون الكبد
والقلب والأعضاء
يا ألف حسرة يا مصر
صبحوا الولاد أعداء
طايحين بيعصروا عصر
ويقطعوا ف جسمك
ويبيعوا لحم البشر
وينجسوا اسمك
كبر الفساد وانتشر
قومى الحقى نفسك
صدى هجوم الغجر
مرة اصرخى نحسك
دقى النفير للغّر
ووضحى الصورة
دة الشقيانين السمر
لسه مع الكورة
من اليابان للسودان
لبطولة انجولا
وفرحانين بالنصر
والفوز على غانا
ومصر جوة الأسر
يا حسرتى ياااااانا
على شعب رفع العلم
يهتف للعيبتة..!!
نازلين فيه ضرب بصرم
ويرقصوه بخيبتة
ويفرحوه بجونين
والأمنيات أجوان
يصحى على قوانين
نازلة ولا القفيان
يخرس ويرفع علم
والمرة دى ابيض
سلمت يا أهل الكرم
حبه هوا راح امووووت
ندخل بطولة كمان
ينسى المرار والألم
يضرب فنله وبوت
ويلونوه بالعلم
ويلبسوه زعبوط
يرجع أليف تانى
يهتف عشان النصر
ويغنى فى اغانى
ولا حد سامع حد
مووووووت
موت ياللىّ بتعانى
تتمرر القوانين
فى الفرحة والهوجة
تتمرر الأيام
ترجع قوام سودا
نرجع لأكل الطين
والزل والحوجة
فيحسوا بالمظاليم
فينظموا فورة
ويفرقوا الأعلام
والرايا معوجة
ويجهزوا الاستاد
للفرحة والهوجة
وف عز فرح الواد
تطلع عيال عوجة
بقانون جديد فى المّر
وينتشوا النتشة
ويغنوا لجلك بعت
يا مصر دى فاطشة
شعبك قليل البخت
لقى عضم فى الكرشة

القاهرة
2010

برجل حمار....

لساك حزين.....!!
اضحك ياواد وانبسط
واخرج بقى من الهّم
مين ينفعك يوم مين
لو يعلى ضغط الدم
ايه يعنى ابوه فاتلهم
عزبة وكام دوّار
ايه يعنى واد عندهم
داخل على المليار
م انت ابوك فاتلكم
حب البلد والناس
اهلك ومين قدهم
يجى خمسميت محتاس
ايه يعنى اصغر عيالهم
ليها فيزا فى بنك
م انت عيالك وغيرهم
اتعودوا ع الضنك
فرفش ياسيدنا وخلاص
ليقولوا دة حاقد......
وسعتها يبقى الخلاص
مالهوش بدل فاقد
فرصة عظيمة تخبى
زى كل الناس.....
تكسب نجاتك يا صاحبى
قبل ما تنداس.......
ايه يعنى قتلوا بلدنا
ومشيوا فى عزاها
ايه يعنى نسيوا ولادنا
ولادنا فاكرها.....
ابداء من اول وحاول
بكره يجى العيد
م تقولش ابدا دة طوّل
بكره جاى اكيد
وابدر فى قلبك وداد
يطرح فى وشك نهار
دى الشاطرة تغزل يا واد
حتى برجل حمار....

القاهرة
2010

الله يهديكى .....

نفسى اعرف ليه خايفه عليهم
وازاى ساكته على بلاويهم
لا ولادك دولا ولا اخواتنا
ولا لقيوا حد يربيهم.....
وتنادى علينا وتترايسى
وتشاورى الندل اهو فيهم
نيجى ناخد حقك تتمايصى
وتطبطبى بالراحه عليهم
ليه تسعدى ايام السفله
وتخافى من النسمه عليهم
يسرقوا يقتلوا نايمه ف غفلة
ومحوّطه بالرمش عليهم
وان قولنا حرام
يعملوا حفله.........
وحكاية وقصة وحدوتة
وتصقفى فى الحفله يا غافلة
وتقولى عيال مش مظبوطة
وحقودة تشكك فى اخواتهم
لو دول اخواتنا يا موقودة
تبقى انتى موانسه ف سرقتهم
أو عاشقة القصه الملتوتة
ترجعى تصرخى
هات ياض حقى.......!
نرجع ونشد على ايديهم
تسبينا نحارب وتدقى
فوق راسنا كأنك رجليهم
وتقولى مخلفة رجالة
ونقول طب ليه بتزليهم
سيباهم ليه فى القيالة
وتضلّلى على اللىّ بيكويهم
وتضلّى لو يحكوا مهالك
تشهدى بالزور ليه ترضيهم
م الآخر كلمه هقولهالك
الله يهديكى ويمحيهم....

القاهرة
2010

السبت، 30 يناير 2010

رد اعتبارك.......

رد اعتبارك يا مصر
مش ماتش تغلبى فيه
رد اعتبارك..... تار
من مين فى يوم تاخديه
ومنين نجيب الولد
اللىّ هياخد التار
وامتى يجى الوقت
اللىّ هتاخديه فيه......

رد اعتبارك يا مصر
كما حمل فوق الراس
كما هم يكسر كسر
كما صهد فى الانفاس

رد اعتبارك طريق
ولابد يوم نمشيه
ولحد ما نوصله
اوعاك يوم تنسيه

رد اعتبارك فرض
والكل عارفينه
ومكلفين بالرد
وان طالت سنينه
خليك فاكره يا مصر
ان احنا م الآخر ...
لو يعصروا كده عصر
ماشينه ... ماشينه..!!

القاهرة
2010