واقفه مايصة ......

النهاردة لمحت صورة للبطولة
خلق واقفه ناس بتهتف
ناس تندد ناس تهدد
ناس جسورة.....
قمت سائل واد معدى
قولى وحياتك يا فندى
البشر دى واقفة ليه... ؟
قالى ابدا يابن عمى
خلق محبوسة ف خوفها
مهما تصرخ......
مين هيسمع مين يشوفها
واقفه عندك واقفه عندى
واقفه دايماً مش جديد
قولت ايوة يعنى بعد الواقفة عيد
يعنى فيه فتّة ولحمة
يعنى فيه حمّر وطش
قالى يابا انتة بتحلم
لسة زى ما هيه مش
واقفة عندك واقفة عندى
واقفة تخزى بيها مرة سنين كسوفها
واقفة يمكن لو تشوفها ....
تقول خلاص دا ما عدشى غش
قولت ماشى ........
بس بعد الواقفة ايه.... ؟
قالى فش....... !!!
يعنى منظر يعنى صورة
كلمتين وقوام بسرعة
هش ياض ويابت هش
ترجع المركب لسيرها
والبواسل يعكسوا الدفا لغيرها
تبقى مركبنا اللىّ ماشية
ماشية مش عارفة نهار دة ولا ليلها
تايهة جوة الموج تعافر
والغرق اصبح مصيرها
واللىّ عامل فيها راجل
مرة واحدة قوام يكش
هش ياض ويابت هش
رجعت المركب لسيرها
والقلوب اللىّ زمان ماتت ضميرها
برضه رجعت بالمحايلة لخط سيرها
يعنى رجعت للنعومة وللمسايسة
يعنى راحت كل واصفة ف المقايسة
يعنى شاخت أمنا وفى الضلمة حايسة
واللىّ وقفوا وقالوا لاء بقلب جامد
وقفوا قعدوا مهما عملوا خلق مايصة
والبشر اللىّ افتكرها بشر جسورة
طلعوا زى ما قالى صورة
طب وقفتوا الواقفه ليه... ؟
طب وبعد الواقفه ايه ... ؟
واقفه ايه دى اللىّ آخرها الناس تكش
وتقولولى عيال جسورة
م افتكرش ........ !!
رد واحد م البواسل
قال عايزنا ف زيت نطش
خش انته ياعم وحدك
طش ضهر وطش وش
واحنا سبنا الواقفه بعدك
هش ياض ويابت هش .....

القاهرة
2010

البحّار......

أخويا ياساكن م بين البحور
يابحّار وهايم بمركب تدور
على كل مينا ومرسى ومدينة
توزع ف شوقك كأنة نذور

وسايب ف قلبى جراح الفراق
وحابب غيابك ونار لشتياق
وآخرة فراقك تجينى فى ليلة
يادوب هيه ليلة ويعود الفراق

تبحر وبحرك يشيّب شباب
تخاطر يا اخويا ف قلب الصعاب
تلف الموانى وحلمك بسيط
وأرضك بتجرى وسقفك سحاب

م ترجع وحقق ما تحلم معانا
جرحنا بعادك وجرّح هوانا
شبعنا وداعك كفاك إغتراب
ولو شوقنا ينطق هتنزف دمانا

وفارق معانا وجودك بعيد
تصدق اقولك وجودك ده عيد
مش انته الصغير وفرحة ابويا
مش انتة اخويا وحبيبى الوحيد

وقالوا ده جاى ده قال بعد يوم
وفاتت ليالى ولسة الهموم
وغالى ياض انتة وفرح السنين
ولولا الملامة اجيلك وعوم

بعتلك سلامى وجودى وياسين
بيهدوا التحية ويهدوا الحنين
وماما وبابا بيدعوا تجيلنا
بفرحة ونصرة نأمن آميين

وصلى على طه خير الأنام
صحابك بيهدوك كتير السلام
وزوجتك واختك وكل الحبايب
بيدعولك انتة بأحلى الكلام

يا نور الفنارة يا شدّة قلوع
ياساكن بهلبك ف وسط الضلوع
بحبك ...بحبك .. واحلف ب ربى
ختمت القصيدة عشان الدموع .....

القاهرة
2010

المرايا.......

النهاردة بطل طلة فى المرايا
ف إنتبهت....
ده شعرى شاب.......!!!
عدا عمرى وألف حسرة عليك ياعمرى
وع الشباب.............
شيلت حزنى ف قلب قلبى وروحت خارج
روحت أصلى الجمعة وادعى
ع الديابة والزنادقة والخوارج
مش حزين على شعرى لبيض
الألم من عمر رايح
ياما قالوا بكرة تفرح.........
بكرة جاب بكرة وكتر م الفضايح
وف صلاة الجمعة كان الكل قاعد
والسكوت مالى المكان
لحظة شوفت إمامنا صاعد
منبرة رُفع الآذان..........
واما تم آذانا قام وابتدى الشيخ الكلام
وامتدح فى كل فرد من الديابة
امتدح كل الزنادقة والعصابة والخوارج
قومت خارج.........!!
روحت اصلى ف حتة تانية
شيخها مايكونشى برتبة أولعُبان
روحت حىّ بعيد كمان.......
بين جموع الناس قعدت فى حالى ساكت
خطبة كانت زى غيرها.......
عن ولاة الأمر اصحاب الجواكت
دول فادونا ودلعونا دول حمونا من المهالك
قومت قايم تانى ساكت......!
قولت أبعد عن شارعهم ألف شارع
روحت جامع شكلة ان امامة بارع
قول قعدت خمس دقايق
قول فهمت الخطبة دايرة
ع المساندة وع المناصرة
عن حاضرنا وعن ماضينا
قولت جوة نفسى تسقط
كل دولة تسيىْ لاسلامنا ونبينا
كمل الشيخ الكلام........!!!
المساندة للفريق القومى مش علشان نبينا
قولت خيبة وألف حسرة على اللىّ صابنا
واللىّ فينا..............
قومت قايم تانى ماشى فى المدينة
كل م ادخل لجل ما اسمع خطبة ألقى
اللىّ فيها مش اللىّ فينا
ناس تؤيد ناس تمجد
ناس بتمدح ناس تهدد
{ أوع حد يكون بيحمل للحكومة أى أحقاد أو ضغينة }
قولت ارجع للمرايا
بطل طلة م التقيت فى شعرى شعرة واحدة سودا
كله ابيض.......!!!!
قولت يعنى العمر عدا بدون إفادة ولا إستفادة
قولت يعنى العمر عدا بدون سعادة
عدا زى قلم بيجرى ع الورق وبكل يسر
جانى هاتف...دق قلبى
سمعت صوت بيقولى أبداً
لسة بدرى ............
وان ما كان لينا لولادنا
قوم بقى استغفر وصلى
إن بعد العسر يسر
إن بعد العسر يسر........

القاهرة
2010

فرق شاسع.......

فرق شاسع..............
بين حديد السيف وحديد الجدار
بين سلام القوة وسلام لنكسار
بين دموع الغاز ودموع لنتصار
بين بلاد الظلم وبلاد العمار
بين بذور الورد وبذور الدمار
بين نهار فى نهار وبين الليل نهار
فرق شاسع.................
بين عواء الذئب ومواء القطط
بين كلام الجد وكلام العبط
بين شعوب عايشة فى خيرها وبين شعوب بالعة الزلط
بين محبة فى صدورنا وبين محبة على اليفط
بين خرج يعمل مظاهرة وبين جابوه لما شبط
بين وقعت ف شر عملك وبين وقعت بدون غلط
فرق شاسع.................
بين نباح الكلب وزئير الأسد
بين ولاد الغرب وولاد البلد
بين شهيد الحرب وشهيد الكمد
بين كلام لبناء وكلام للهدد
بين جموع الحق وكماله العدد
بين سلامتك يا زعيمنا ...!!
وبين سلامتك يا بلد..........
فرق شاسع............
فرق شاسع........

القاهرة
2010

حققت أحلامى....

خلاص حققت احلامى
أخيرأً جبت أنبوبة
تعبت كتير فى ايامى
ومش هحلم خلاص توبه
مانيش طالب من البهوات
غير انها تكفى نص الشهر
وتعمل شاى خمس مرات
وترحمنى اسبوعين م القهر
وايه يعنى بقت غالية
م طول العمر مدعومة
وبرضة اخوتنا فى { ناتانيا }
ليهم فى القومة والنومة
نقومها هنا شوية
ننيمها هناك نومة
نولعها هنا ف ثانية
بلاش من طشة التومة
سيبونا نخفف المعناة
على اخواتكم فى { تل ابيب }
ونبعت غازنا للمواساه
يعزونا ف شهيد انابيب
تدوم الألُفة والعشره
عدو الأمس يبقى حبيب.!!
ونبصم ليكو بالعشرة
ما يدخل بينا اى غريب
وكله يهون عشان مصرك
وبكرة هيرخص البوتاجاز
بلاش تنسى قوام أصلك
وإرجع للباجور أبو جاز
ومتبصش على غيرك
دى ناس محتاجة لمساعدة
خلاص يعنى ما فيش غيرك
قوم إقرا كتاب عن الوحدة
هتعرف إن دة مشروط
وحق طبيعى ومعاهدة
هتعمل فيها واد فلوط
قابلنى ان خدت يوم واحدة
أقف ساكت ف قلب طابور
ومد إيديك وإشحتها
يا إم اسرق يجيلك دور
تركيبها بغلوتها....
وفوضك م الطريق لإيلات
ماسورة غازنا مرغوبة
سلاما ع اللىّ عدا وفات
ياعم بلاها ...انبوبة...

القاهرة
2010

يدوم العز....

فرجت ياواد هتهيّص
على بابا باع الكنز
افتح بقى البلاليص
وادعى يدوم ( العز)
مصر النهاردة آمان
والمستخبى اهو بان
ونباشين القبور
هيركبوهم بنز..!
عندك ياحاج فيه كانز ؟
لا عندى راس رمسيس
وقط شكله جنان
اسود سواده فطيس
ومشط رع وهامان
توابت وموميا هاميس
جرانيت عقيق مرجان
دهب ياقوت ورخيص
بردى ومن أزمان
وفسيفساء فسافيس
نقوشات جميع للوان
كوبرا كباش نسانيس
معروضة فى الدكان
ولا قفل ولا ترابيس
لاخريطة ولا طيران
ولا فوج ولا اتوبيس
ولا خيمة ولا كرفان
ولا بسبسة وتأليس
ولا بهدله لأسوان
كله هنا ف قراطيس
بعنا بصلاة النبى
للىّ دفع بدولار
للعربى والأجنبى
حاجة اصلى مش تذكار
والشعب فين والنبى ؟
الشعب !!!!
موووووووووت ياحمار
مشغول بجدو وزكى
وتصريحات سعدان
ومين سبب ضربنا
فى موقعة درمان
ومين لعن أمنا
وداس علمنا كمان
شغلوكى يا مصرنا
شغلونا بالالحان
دقوا طبول حربنا
لجل العيال دى تبان
وبعد بيع التاريخ
وموافقه البرلمان
على قانون الكلى
والفشة والعصبان
طالع قانون الكبد
والقلب والأعضاء
يا ألف حسرة يا مصر
صبحوا الولاد أعداء
طايحين بيعصروا عصر
ويقطعوا ف جسمك
ويبيعوا لحم البشر
وينجسوا اسمك
كبر الفساد وانتشر
قومى الحقى نفسك
صدى هجوم الغجر
مرة اصرخى نحسك
دقى النفير للغّر
ووضحى الصورة
دة الشقيانين السمر
لسه مع الكورة
من اليابان للسودان
لبطولة انجولا
وفرحانين بالنصر
والفوز على غانا
ومصر جوة الأسر
يا حسرتى ياااااانا
على شعب رفع العلم
يهتف للعيبتة..!!
نازلين فيه ضرب بصرم
ويرقصوه بخيبتة
ويفرحوه بجونين
والأمنيات أجوان
يصحى على قوانين
نازلة ولا القفيان
يخرس ويرفع علم
والمرة دى ابيض
سلمت يا أهل الكرم
حبه هوا راح امووووت
ندخل بطولة كمان
ينسى المرار والألم
يضرب فنله وبوت
ويلونوه بالعلم
ويلبسوه زعبوط
يرجع أليف تانى
يهتف عشان النصر
ويغنى فى اغانى
ولا حد سامع حد
مووووووت
موت ياللىّ بتعانى
تتمرر القوانين
فى الفرحة والهوجة
تتمرر الأيام
ترجع قوام سودا
نرجع لأكل الطين
والزل والحوجة
فيحسوا بالمظاليم
فينظموا فورة
ويفرقوا الأعلام
والرايا معوجة
ويجهزوا الاستاد
للفرحة والهوجة
وف عز فرح الواد
تطلع عيال عوجة
بقانون جديد فى المّر
وينتشوا النتشة
ويغنوا لجلك بعت
يا مصر دى فاطشة
شعبك قليل البخت
لقى عضم فى الكرشة

القاهرة
2010

برجل حمار....

لساك حزين.....!!
اضحك ياواد وانبسط
واخرج بقى من الهّم
مين ينفعك يوم مين
لو يعلى ضغط الدم
ايه يعنى ابوه فاتلهم
عزبة وكام دوّار
ايه يعنى واد عندهم
داخل على المليار
م انت ابوك فاتلكم
حب البلد والناس
اهلك ومين قدهم
يجى خمسميت محتاس
ايه يعنى اصغر عيالهم
ليها فيزا فى بنك
م انت عيالك وغيرهم
اتعودوا ع الضنك
فرفش ياسيدنا وخلاص
ليقولوا دة حاقد......
وسعتها يبقى الخلاص
مالهوش بدل فاقد
فرصة عظيمة تخبى
زى كل الناس.....
تكسب نجاتك يا صاحبى
قبل ما تنداس.......
ايه يعنى قتلوا بلدنا
ومشيوا فى عزاها
ايه يعنى نسيوا ولادنا
ولادنا فاكرها.....
ابداء من اول وحاول
بكره يجى العيد
م تقولش ابدا دة طوّل
بكره جاى اكيد
وابدر فى قلبك وداد
يطرح فى وشك نهار
دى الشاطرة تغزل يا واد
حتى برجل حمار....

القاهرة
2010

الله يهديكى .....

نفسى اعرف ليه خايفه عليهم
وازاى ساكته على بلاويهم
لا ولادك دولا ولا اخواتنا
ولا لقيوا حد يربيهم.....
وتنادى علينا وتترايسى
وتشاورى الندل اهو فيهم
نيجى ناخد حقك تتمايصى
وتطبطبى بالراحه عليهم
ليه تسعدى ايام السفله
وتخافى من النسمه عليهم
يسرقوا يقتلوا نايمه ف غفلة
ومحوّطه بالرمش عليهم
وان قولنا حرام
يعملوا حفله.........
وحكاية وقصة وحدوتة
وتصقفى فى الحفله يا غافلة
وتقولى عيال مش مظبوطة
وحقودة تشكك فى اخواتهم
لو دول اخواتنا يا موقودة
تبقى انتى موانسه ف سرقتهم
أو عاشقة القصه الملتوتة
ترجعى تصرخى
هات ياض حقى.......!
نرجع ونشد على ايديهم
تسبينا نحارب وتدقى
فوق راسنا كأنك رجليهم
وتقولى مخلفة رجالة
ونقول طب ليه بتزليهم
سيباهم ليه فى القيالة
وتضلّلى على اللىّ بيكويهم
وتضلّى لو يحكوا مهالك
تشهدى بالزور ليه ترضيهم
م الآخر كلمه هقولهالك
الله يهديكى ويمحيهم....

القاهرة
2010