أكتبك...........

يكتب العاشق جوابه
...بالدموع...
يكتب الشعراء كلامهم
...بالسجوع....
يكتب العابد إيمانه
...بالخشوع...
تكتب الشمس الحقيقه
...بالسطوع...
يكتبوا الفرحة بميلادة
...بالسبوع...
يكتب المظلوم براءتة
...بالدفوع...
يكتب المركب ثباتة
...بالقلوع...
وأكتبك يا مصر أمى
بالبطاقة............
ونار بتكوى فى الضلوع.......

القاهرة
2009

العيب على اللىّ غلط...............

مش مصر ترخص وتمسخ
لما واد فيها ............
يسرق ويسكر يعربد فى فنادقها
ولا شوارعها وحواريها
مصر الحبيبة العظيمة
غصب عين الكل
ورموزها مش رقاصينها
رموزها أهليها........
يطلع خبر فى المسا ولا ف نهار يطلع
يطلع فى (فجر) (البلاغ)
رمزك طلع هليس........
يا خلق يا مهيسه يا حواشى وبترطع
رمزى اللىّ جاب النصر
مش دول ده دول خنافيس
ونلاقى واد منتشى
ثأر كما الفرسان
ويقول ده عيب نختشى
يا ناس ده زور بهتان
متشوهوش الرموز
دول مصر يا جدعان
نسمع نقول له إتلهى
خليك مع الرايجة
وإن كان ده رمزك
فإسمك جاى بكرة كمان
م فيش ياعم المدردح
دخنه من غير نار
وفرّ عبطتك لنفسك
مهما كانوا كبار
مصر اللىّ عملت كبارها
ولما يتكشفوا
تطلع ديول الأكابر
تنفى فى الأخبار
م فيش كبير على مصر
واللىّ غلط حاسبوة
وإن كان كبير
العقاب يبقى أكيد أكبر
وتعيبوا ليه ع الناس
علشان رجال كشفوه
العيب على اللىّ غلط
لو حد بيفكر.........

القاهرة
2009

تقول له ايه.......

كان نفسى اقابله
حتى لو لخمس دقايق
كان نفسى أواجهه
بنص أو ربع الحقايق
كان نفسى يسمع رأيى فيه
منى أنا.......
مش م الحدادى والحدايق
ربك حكم ... قدّر قدر
وف ليلة كان الله أمر
بصيت لقيتنى فى سكته
هبّا ف دقايق...........
فناديت عليه ورفعت منديلى ف إيدى
قال مين...؟
فقولت ياعم انا
مجدى الصعيدى
قربت منه الخطوتين
فيه إيه...؟
فقولت أنا
كلمتين...
قال: قول
فقولت له أولا
إن كان فيه حاجة عند كلب تخصك إنته
تقول له إيه......؟
قالى:هقول له أكيد يا سيدى
رديت وقولت: أسمع يا سيدى
وقعدت أحكى وأزيد وأعيد انا فى الكلام
وحكيت له على كل اللىّ فيّا واللىّ فيهم
واللىّ فيها م المشاكل والمصاعب والآلام
وغريبة شوفتة سامعنى رغم المسئولية بإهتمام
فجأه لقيتنى رافع المنديل
وقاعد ع الحصير
الله يجازى أم العيال
فتحت عليّا النور فضيعت المنام
وقالت لىّ قوم بتنام كتير
الساعة سبعة بالتمام
وصرخت إيه
طب أقول لصاحب الورشة إيه
إتأخرت ليه
قالت: صحيح
لما المعلم يسألك هتقول له إيه
أنا قولت :طبعا مش هقول
قالت:خلاص
قوم كلمه واستسمحه لجل العيال
محتاجه لقمة وهدمتين
والبنت عايزة كشكولين
والواد بقى له جمعتين
طالب نجيبله مثلثين
وإيجارنا والبقال ودّين أم حسين
والخضرى والعطار وقسط المفرشين
وقماشتك الترجال وجلابيه ياسين
فجريت على الورشة
قابلنى معلمى
قال: كنت فين...؟
أنا قولت له:أصل الحكاية فى المنام
ودة شىْ حقيقى مش بإيدى
قال لى : منام........!
آحكيلى يلا قوام عليه
أنا قولت له
أسمع يا سيدى...

القاهرة
2009

ربك معاك.......

قوم ليه قطعت النفس
ياعم ايه صابك..!
من ضربتين تتخرس
تتشل اوصالك

لسه طريقنا طويل
قوم كمله يلا
من ضربتين هتميل
وحد يا سيدنا الله

قوم شد تانى العود
إفرد قوام ضهرك
فرحت فينا اليهود
عيد عندهم قهرك

الله وعد موعود
للشهدا حور وجنان
إرجع يا اخويا وعود
للسنة والقرآن

ارجع لرب عظيم
معروف بآياتة
رحيم قوى وكريم
بديع فى سماواته

نصرك اكيد ليه تخاف
ربك معاك فاكر
ارسل فى بدر جنود
لا اتصابوا ولا ماتوا.....

القاهرة
2009

نشيد السكك الحديدية........

مات لك كام يا صبيه
فى القطر بتاع العياط
مات خمسين واتصابوا ميه
ويمكن اكتر من كده مات

وكام قبليهم يا صبيه
م السكك الحديدية مات
قول يجى الف وتلتميه
وده فى شهور مش ف السنوات

ماتوا كده ليه يا صبيه
ومين مسئول عن كده بالذات
المسئول شله حرامية
اللىّ شاغلهم حنفيات

وده بقى ليه يا صبيه
مش خصصوا ليها مليارات
ايوه خدوها وكان فى النية
بس اتصرفت ع الدهانات

ولجنة ايه يا صبيه
هتوضح لينا الاسباب
لجنة ايه ما توحد ربك
شربوا الكانز واكلوا كباب

وعملوا ايه يا صبيه
بعد بيان عدد الاموات
جابوا توب اسود م الغالى
وشكر الله سعى البهوات

ونعمل ايه يا صبيه
علشان ما نعدى الازمات
اقتلوا كل جاموسة ومعزة
واقفلوا كل المزلقانات

وان جت حادثة يا صبيه
افظع واسود م الهباب
يبقى العيب فى الناس يا عنية
او فى الكمسرى والركاب

القاهرة
2009

المشكلة جاموسة ...!!

بعد الميعاد ....انطلق
نعش الولاد يجرى
كان نعش قبله انحرق
والوصف كان مجرى....
وده وصفه من غير وصف
صندوق ببوابه ......!!
يقصف فى عمرنا قصف
وغلبنا فى كتابه
ولا حد سامع حد
ودعاية كدابه ...
حافظ دى ممتلكات
ملكك ورسمية
حافظوا انتو يا فلنكات
ده ف لحظة مات ميه
يا حجر ومن غير قلب
ياعصابة دولية
ياللىّ نسيتوا الرب
وشاغلكوا حنفية
ركبوا الولاد النعش
من مختلف لنماط
بياع وواد مرضعش
سرّيح بنس ورباط
عسكر شقارة وسمر
وموظفين حلوين
عمال ف عز العمر
ودكاترة م الفالحين
وبياعين السمن
وناس من المعمار
وطلبه ورجال أمن
وفلاحين شطار
اتلموا جوه النعش
يا مجمع الاقدار
مشى نعشهم للقدر
داخل على العيّاط
لحظات وبووم انفجر
وصراخ ..........
صويت .............
وعياط .............
وسعات ودم العباد
يجرى كما القنوات
ارواح بريئة يا واد
طالعة لسبع سماوات
بفعل واحد غبى
وبظلم ناس بشوات
وسعااااااااااا ت
يا فرج النبى .....
ظهروا خلاص ضباط
وقاده من كل جيه
وملايكه م الوزارات
كاميرات ......
مواكب ....وفيها
مراسلين قنوات
جايين بربط المعلم
والكانز للفرجة ...!
لا ونش جيه ولا سلم
وبقينا اهوه فرجة
وولادنا جوه النعش
نازلين دما وصوات
والمسئولين للنعش
بيبصوا كالاموات
والكانز ما بينفعش
هات لب للبهوات
دى الفرجة ما بتنفعش
الا مع المزات .....
سبع سعات والجسر
قرب خلاص ينتهى
يا ناااااااااااااااااااس
يا حطه النسر
ونجوم على كتفها
امتى البلد دى تفوق
م النومة واللوصة ..؟
قالوا يابا اهدى وروق
دى المشكلة جاموسة..!!

القاهرة
2009

عقل واحد....

انت عندك عقل واحد
لو صغير أو كبير
لو مريش أو فقير...
لو رفيع أو تخين
لو بتضحك أو حزين....
انت عندك عقل واحد
لو مفتح أو ضرير
لو فى جامع أو فى دير...
لو قصير أو طويل
لو بصحة أو عليل....
انت عندك عقل واحد
عقل واحد.............
نفس حجم الناس جميعا
نفس لونه ونفس شكله
حتى واخد نفس حيّز
عقل واحد.........
لية بتفسد إعتقاده
بفكر جاحد...؟
وانت عارف إن عمرك
يوم ماتلقى له بديل..!!!
انت عندك عقل واحد
فوق يا صاحب العقل ميّز.....

القاهرة
2009

ما نيش فاهم.....!!

قريتها يمين...
قريتها شمال...
قلبت الصفحة وقريتها متين مرة
ما نيش فاهم...!
صحيح جملة........
لكن تحمل من المعنى
كتاب...... كتابين
وكل كتاب بداخلة الهم
قول همين...........
وانا بالكاد بفك الهم والمرة
قريتها مرة ف صيامى
قريتها مرة بعد فطورى وسحورى
قريتها حتى ف احلامى
قرتها مرة وانا لابس
ومرة تانية وانا عريان
قريتها مرة وانا واقف
وانا جالس.............
وانا نايم وانا فرحان وانا زعلان
قريتها حتى وانا حران .....
قريتها تانى وانا بردان ....
مانيش فاهم.....!!
قريتها ف بيتى فى القهوة
قريتها حتى فى الأتوبيس
وفى المترو..............
وف المصنع وف الجامع وف الشارع
على المسرح وف الكواليس.
قريتها مرة ساعة صبح
قريتها حتى قبل ما انام.
قريتها مرة وانا فاتح شبابيكى .
قريتها مرة وانا قافل على نفسى
بمفاتيحى.... وبالترابيس
ما نيش فاهم....!!!
قريتها ف شهر..... يناير
وفبراير وفى مارس وفى ابريل
قريتها ف مايو وفى يونيو وفى يوليو
قريتها فى جميع ليام.......
قريتها مرة بالقبطى وبالهجرى
قريتها ف كرسى ستاشر
ف عربية تلاتة ف قطر سبعة الصبح
فى المجرى............
قريتها لما عمل الحادثة وانا بجرى
قريتها فى دورة الكورة
على اللعيبة والجمهور
وع الحكام وع الحراس
ما نيش فاهم..!!!!
كتبت الجملة فى ورقة مابين...( أقواس)
عملت قصيدة للعلما وللنبها وللفاهمين
وللنواب .....
عملت قصيدة للبهوات وللبشوات
قريتها تانى للفقرا وللعاجزين وللخايبين
وللجهلا...و.للأعداء
وللأحباب.........
قصيدة لكل كل الناس
محدش رد ولا فاهم....!!!!!
كتبت الجملة من تانى مابين أقواس........
(حكومة مصر تحث رعاياها فى داخلها بضبط النفس )
(ودفع ضريبة الأنفاس)

القاهرة
2009

هتفضل شيخى.........

هتفضل شيخى مهما تغيب
عن المحروسة ورجالها......
هتفضل زى اسوارها

بتحميها من العادى.......
وصوتك لسة زى ما كان مجلجلها
مفوقها ..........مصحصحها

مهوش صوت مستكين ....هادى
يقولوا الناس خلاص سافر وودعنا

أبص فى وش كل الخلق

أقول دة كلام بلا معنى

وم الأخر كلام فاضى

أقدم بالمشيئة......
و اقول اكيد راجع .....
ومهما طالت الايام

هيرجع تانى فى ميعاده

هيرجع تانى لبلادى

ما دى بلاده....

يمد ايديه ونمسك ايده بأيدينا

يوعينا ......يعدينا.....يفهمنا

ونسمع لة........ويسمعنا
على القران وع السنة يجمعنا

فقولى بربك امتى تعود..؟
حقيقى يا شيخ.........

فراقك عنا احسة ف قلبى كالطعنة.

القاهرة

2009

تدوم الإفتاء....!!

سمعت المفتى قال إفتاء
تفرّح كل واد محزون
يجوز تفطر يا لعيبنا
مادام هتشوط وهتجيب جون
كأن المفتى........ سيدنا
دارس علمة ..........
على إيدك يا ابو تريكة
وحصل فقه م العرجون
تدوم الإفتاء..... والمفتى
وتحيّا الفته....... بالكمون
وتحيّا مصر..... بالكوسة
وفى الغرقا ... وف اللوصة
وف النكبة .......
وف الحوسة ......
بتحيّا فى كل وضع... تكون....!!
مانيش زعلان من الإفتاء
ولا المفتى.......
ولا الفرقة.......
ولا الفرقا........
ولا الفاطرين.....
ولا المجنون......
ما نيش زعلان... وهزعل لية
مادام الإفتاء من وارد بلاد روما
وقبلتها ......... جوانتناموا
ومفتيها......... دارس علمة
فى بيت أبيض .....
وبنتاجون.....!!

القاهرة
2009

غنوة رمضان......

وحوى ياوحوى .... ايوحا
وكمان وحوى ...... ايوحا
ميت يا حرام ....... ايوحا
قالوا عندة زكام ..... ايوحا
وزكام من طير ..... ايوحا
وزكام خنازير ..... ايوحا
وحكومة خلاص ... ايوحا
خايفة على الناس ... ايوحا
دبّحوا فى الطير .... ايوحا
قتلوا الخنازير ...... ايوحا
وباعوها ف كيس ... ايوحا
والناس بلاليص ..... ايوحا
وبتزلط زلط ....... ايوحا
معدتها إسفلت ....... ايوحا
تهضم اتوبيس ...... ايوحا
كبروا الجواسيس .... ايوحا
وإغتنوا والناس ..... ايوحا
قاطعة الأنفاس ....... ايوحا
ولا حد يقول ........ ايوحا
فين راس الغول ..... ايوحا
والغول مبسوط ...... ايوحا
والناس بتموت .......ايوحا
والحل بسيط. ....... ايوحا
من غير نبابيت ...... ايوحا
نرفض نتهان ........ ايوحا
من اى جبان ......... ايوحا
نكشف جواسيس ..... ايوحا
نطرد أباليس ......... ايوحا
ويعود الحق .......... ايوحا
بس نقول لاء ........ ايوحا
ونعيش أحباب ....... ايوحا
ونتربس باب ........ ايوحا
ليجى التطبيع ........ ايوحا
من بعدة نضيع ....... ايوحا
ترجع جواسيس ...... ايوحا
تحيا الأباليس ........ ايوحا
نرجع نتهان ......... ايوحا
من كل جبان ........ ايوحا
من تانى نعانى ...... ايوحا
ونموت من تانى ..... ايوحا
بزكام الطير.......... ايوحا
وزكام خنازير ....... ايوحا
أو بالتيفود ......... ايوحا
أو سوس أو دود .... ايوحا
وسعتها يا ناس ...... ايوحا
م نلومش خلاص ..... ايوحا
وإن داسنا الناس ......ايوحا
نتلهى ننداس ......... ايوحا .....!!

القاهرة
2009

يعنى أكدب.....

بكتب زى الناس ما بتكتب
بس الناس شيفانى حزين
طب وانا هفرح لية
يعنى أكدب..؟
عيب على شنبى أبقى بوشين
أفرح لية وإزاى ما تقولوا
هو فية حاجة تفرّح يعنى
منا اهوه عايش عمرى بطوله
حزن وجرح وهم واجعنى
مرة أصحابى ومرة جيرانى
مرة اخواتى ومرة الأهل..
ناس أعرفها وناس عرفانى
مش عيزانى اعيش بالسهل
دة بيتعافى ودة بيتلائم
ودة بيخطط ودة بيزل...
ودة من خوفى علية بيتشائم
ودة من حبى خلاص بيّمل....
أكتب يعنى بفرح إزاى
حد يقولى شعور الفرحة
حد يقولى أصل انا نساى
أوصف بس إزاى الفرحة.......!!

القاهرة
2009

زنبى اية...؟

قلبى عاشق......
كل ذرة فى ترابك.
كل نقطة مية شيلاها ف سحابك
كل نجمة فى سماكى......
قلبى عاشق......
كل ضحكة طفل فيكى
كل فرد يخاف عليكى
كل دايب فى هواكى........
قلبى عاشق........
كل شتلة زرع ف إيدين فلاحينك
كل باب ف حدود ما بين حضنك
وغيرك........
كل واحد قال بحبك أو فداكى.......
قلبى عاشق..........
كل جندى بدمة سطرلك تاريخ
كل كاتب ..كل عامل..
كل زارع ..كل شيخ
كل واحد تحت شمسك
عاش بيضحك ولا باكى
قلبى عاشق...........
كل تلاميذ المدارس
كل طالب جوة جامعة
كل واقف كل جالس جوة جامع وقت جمعة
كل عابر كل عابد جوة منك وف حماكى
بس فية حاجة تحيّر جوة منى
نفسى اقولها.........!!
وإنتى برضوا اكيد يهمك
انة ما يحتار دليلى.....
رغم إنى بجد عاشق يا ملاكى
رغم إنى بجد دايب فى هواكى
بس شايف شوف بعينى
الحياة بقى لونها كاكى..
وإنتى عاشقة الحكم ميرى....!
والسؤال.....؟
زنبى اية أتمرمط معاكى.......!!

القاهرة
2009

عندك حق...!

شوفت قلبى حزين بيبكى
قولت أفرّح قلبى مرة
خذتة جمبى قعدنا نحكى
قولتلوا قوم بص برة
القمر فى العالى واقف
والنجوم حولية حراسة
والشيطان مطرود وخايف
والشهاب ضرب الرصاصة
واللىّ غايب علم ربى
واللىّ حاضر دة المقدر
وإنت بسم اللة يا قلبى
فى المحبة اللة أكبر......
لية بتبكى...ولية بتشكى
لية بقيت والحزن واحد.؟
أنت أبيض مهما يفتى
أى ندل غيور وحاقد
رد قلبى كات إجابتة ع السؤال
إنت مش حاسس آلامى
ولا عايش فى الخيال
البشر ع الأرض حاير
كل فرد له ألف ظالم
كل يوم بتموت ضماير
والقلوب شبعت مظالم
قولتلوا هوّن عليّ
لية تقلب فى المواجع
عندى أرض وعندى ميه
مش هروب... الظلم دافع
رد قلبى وقالى عارف
العطش فى البحر قاتل
مهما تشرب مش هتشبع
واللىّ متحمل دا راجل
والرجولة شىء بيوجع
بحرنا مش زى غيرهم
صيادينا بدون شبكهم
كل موجة تهد حيلهم
إية اللىّ جابهم مين شبكهم
قولتلوا أطلع سمانا
فى السما جنة كبيرة
رد قال عملى معانا
فيها برضة النار كبيرة
قولتلوا خليك قريب
يعنى تحت النجم عيش
ويا طيرنا ...دة طيرنا طيب
قال حكاية م تتحكيش
السما الحزن صابها
شمسها بتبكى لقمرها
والطيور أكلت صغارها
والحروب نارها لسحابها
قولتلوا م تروق يا قلبى
كل جرح ولية دواه
قالى طيب والمخبى
اللىّ إحتاروا معاه
جرحنا بقى جرح غائر
والأمل فى علاجة وهم
قلبنا كان قلب طاهر
والنهاردة كلة ظلم
هى دى الدنيا اللىّ فيها
الخليل بيخون خليله
والبشر هتموت عليها
والجميع تاية دليله
هى دى اللىّ عشانها عشنا
هى دى اللىّحلمنا فيها
عشنا لكن لما شوفنا
قولنا ياريت كان ما جينا
كنت بسمع فى كلامه
كنت عايز أرد رد
يبرد النار اللىّ فينا
عنده حق يعيش آلامه
وإلتقيت نفسى تقولى
عنده حق ياريت ما جينا...!

الإسكندرية
2009

ناس زينا.....

أنا ما حلمت ف يوم
يبقالى واد أو بنت
ولا عمرى مرة ف يوم
فى الأمنية إتحكمت
ولا مرة كنت الجشع
ولا اللىّ ماله دين
ولا جدى تركى بشع
ولا صلاح الدين
ولا أهلى م الأعيان
ولا م القصور بتطل
انا اهلى ناس غالين
زرعوا جناين فل....
طرحت شجر جازورين
لكن ما يوم خانوا
ولا بدلوا كلامهم
ولا هانوا ولا لاموا
ولا عاشوا ف احلامهم
ولا ماتوا فى كلامه
أنا فرد زى الكل
من مصرأنا إتعلمت
من أب زى الفل
وأم أجدع ست
واخواتى مين زيهم
فى الحب مش لاقى
ولا فى الحنان قدهم
ولا فى الأدب لاقى
وإن كنتوا ناس زينا
وما تعرفوا العيّبة
وناسكوا ناس طيبة
من شرعنا قريبة
يسعدنا نبقى سوا
فى بعثة الطالعين
الباحثين عن دوا
يشفى جراح ملايين
ويحل مشاكلنا.....
ويخفف الورطة...
وإن كنتوا غير ظننا
نبقى أكيد آسفين....
مالكوش مكان وسطنا
ولا حتى ع الشنطة....

القاهرة
2007

على نصين.......

كاتم جراحه الولد
جواه فؤاد مجروح
صعبان عليه انما
قلب الولد ما يبوح
قلب الولد مدرسة
والتجربة تلاميذ
والفهم مش معجزة
العلم فية عواجيز
العلم بابه دهب
والباب عليه انكتب
من جد حتماً وجد
والعلما مش أرجيز
والدنيا مش دحلبة
ولا خداع أباليس
الدنيا ميت تجربة
الدنيا ابو الدهاليز
الدنيا متعيبة .........
ف لسان كسالى القوم
والناس كما الأرنبة
والدة وخايفة تقوم
الناس دى متقسمة
فى بلدنا على نصين
فى خلق مستهبلة
وناس على الوشين ...!

الإسكندرية
2008

كل ما.....!!

كل ما تمسك إيدينا ف حلم
يفلت من ايدينا........!
كل ما نفرح يثور الحزن
ويحوّط علينا.........!
كل ما نرجع لحضن الأم
تصرخ امى فينا.....!
كل ما نعشق بجد
ما حد يحس بينا.....!
كل ما نحلم بحاضر حلو
يجى كما ماضينا....!
كل ما نستنى تطلع شمس
تيجى غيوم علينا....!
كل ما نقرر نفارق
يمنعونا ف أى مينا.!
كل ما نقرب يا فرحة
تبعدى او تبعدينا....!
كل ما نهرب من المرة
نشوفها قصاد عينينا.!
كل ما نرفع قضية
تقع القضية علينا...!
كل ما نفكر فى فكرة للخلاص
تنتهى نهاية حزينة.........!!!

القاهرة
2009

مافيش جديد.......

النهاردة قالولى صاحب العمر مات
ألف رحمة عليك يا اخويا.......
ألف صدمة الف دمعة الف حسرة
ع اللىّ كان والذكرايات........
النهاردة خلاص فارقت الدنيا ديّا
النهاردة خلاص ياصاحبى
سبت كل الارض ليّا
سبت حزنك جوه منى
خذت فرحى معاك يا خلّى
بس صدق.............
لسة صوتك بيلازمنى
لسة فاكر كل كلمة قولتهالى
إية الجديد......؟
كنت اقولك ع الجديد
كنت تبكى من الجديد
لسة فاكر كل كلمة قولتهالى
أوع عنى تغيب ياصاحبى
أوع منى تروح بعيد
كنت اقولك عيب ياصاحبى...!
كنت تتبسم تقولى ياض بهزر
يلا قولى إية الجديد..؟
كنت اقولك ع الجديد
كنت تبكى من جديد..!
شلت همك جوه نفسى
كنت عينى وانا عينيك
كنت اقرب حد منى
كنت اقرب حد ليك
والنهاردة بقيت بعيد
شلت إيدك من حياتى
شلت عينى من عينيك
نام ومطمن ياصاحبى
مافيش جديد.....!!
بعد منك اللىّ فات زى اللىّ آتى
نام ومطمن سعيد
مافيش جديد.....

القاهرة
2009

إنتى عالم جوة واحدة......

روسى هجين بلا أصل
خنزير على تعبان
جاهل ثقافتة النصل
محسوب على الألمان.......
دبح البريئة قصاد الأهل والحكام
والذنب كان الحجاب ..!
فى دولة الأصنام
وصفونا بالارهاب..!
والكدب كان غيّة..!
والدم فى المحكمة أرخص... من المية
والطعن فى مسلمة ملهوش....ولا ديّة
رحلت خلاص البريئة وسبتلنا حجابها
مخلوط بدم الجريمة شاهد على عذبها
دبحوكى يا أختنا.... ظلماً قصاد عينا
م طلعشى لسة القرار يثأر عشان دينا
وكأن لبس الحجاب ....هو اللىّ بيدينا
فات النهار والنهار عدا وراه نهارين
ولسة برضوا القرار م طلعشى للملاين
وبعد صبر الوطن خبط.... علينا الباب
ظهروا حماه الدين جايين بأكبر عقاب
نشجب ..........ونحن ندين ......!
ونهيب بالأصحاب ..........!
ونشيد بالألمان...ونطالب العالم
بالرحمة ع الغلبان دحنا شعوب واحدة
وإنتى مش واحدة فى عالم
إنتى عالم جوة واحدة.....
كلهم نفس الملامح
كلهم فى الحقد واحد.....
وانتى مهما يقولوا واحدة
انتى عالم جوة واحدة ..........
مهما قالوا شالوم .....نصالح
همّا.... همّا....... بقلب جاحد
وإنتى عمرك يوم ما كنتى
ف لحظة جاحدة..
فإطمئنى فى منامك
لسة ما عرفوا مقامك..
إنتى مش واحدة فى عالم
إنتى عالم جوة واحدة....

القاهرة
2009

المرور..........

مرت سنين العجاف
والجاى علينا سؤال...؟
مين اللىّ يقدر عليه
مين اللىّ هيجاوب
كل اللىّ كان مستور
دلوقتى مش مستور
كل اللىّ كان بيخاف
دلوقتى بيحارب........!!

القاهرة
2008

ولا كانش غاوى حياة..!

أسم اللة زى القمر
طالع لابوة وامة
خد من خواله الشجن
والحسرة من عمه
والحكمة فية م الزمن
والحكم كان للة
تاريخ ميلادة إنكتب
ولا كانش غاوى حياة...!

القاهرة
2008

قالوا له بتحب مصر......؟

قالوا له بتحب مصر
رد مش عارف.......
فطلعوا بية السما وعملوا لية ندوات
قالولى بتحب مصر
قولت مش شايف.........
آدى دليل حبها
طلق الحبيب مطاط..!
قالوا له بتحب مصر
عاب حتى فى نيلها
وباب كبير فى التهكم حتى ع الأخوال
قالولى بتحب مصر
قولت أنا حبيبها ..........
عاشق ترابها وسماها فى أى وقت وحال
مجاش فى باله هرم ولا غيطان ولا نيل
ولا حتى طالعة عرابى يوم شعبة كان مكسور
لا لية وطن ولا أصل وتاريخة نصة عويل
عرفت لية رفضوة يا بن بنت عاشور..؟
قالوا له بتحب مصر
رد مش عارف.....
معرفش إن ابن مصر
ما يهمهوش..... رده
يعرف ما يعرف فى حد بيفتخر بالجهل
فية حد يفرح بشعره عن تاريخ حقده
قالوا له بتحب مصر
رد مش عارف.....
مجاش فى باله العبور
وحضارة جيل ورا جيل
ومهما كدب فى شعره
فى التاريخ عايشة.......
مجاش فى باله سعد وبقية التماثيل
ومهما تعوى الكلاب
القافلة ماشية........
قالوا له بتحب مصر
رد مش عارف
ومصر حبها نصر
وهيعرفوها ازاى............
من كسر فتح لكسر واقفة الفصايل صف
مستنين الدور هيلف حتماً جاى
قالوا له بتحب مصر
رد مش عارف............
ولحم كتفة من اللىّ جرّح إحساسها
لعن تاريخها وأساسها وسب مش خايف
ودى غلطة اللىّ بتحضن حد غير ناسها

الأسكندرية
2009

بلد مذكورة.....

فيها إية يعنى تفوز أمريكا
أو تتأهل وإحنا نروح..؟
من ميت سنة وبلدنا يا ويكا
من حظها ماشية بتطوح
ناس بتقول شربت بثمالة
م الملكية ولستعمار...
ناس بتقول أبداً حزنانة
على عروبتها وم الأحوال
ناس بتقول لأ بس جعانة
وناس بتقول لأ م الأوحال
بس حقيقى مافيش رجالة
حتى فى لعب الكورة عيال
راحوا ورجعوا زى ما راحوا
بس الفسحة كانت بريفكس
راحوا وشعبنا فى افراحوا
رجعوا وكلنا شاربين فيكس
ودة بيقسم ودة بيفرق
ودة بيدافع ودة بيصد
ودة بيرد هجوم ودة غرّق
ودة واد خايب حتى ف رد
راحوا ورجعوا همّا عيالنا
إية هيضر ف سلخ دبيحة
يكسبوا يخسروا ياما خسرنا
بس العيبة نعود بفضيحة
لأ ما حصلشى شاببنا مصلّى
ولا يعرفشى الاستهتار
إمدح وإسعى وع النبى صلى
دخان إية من غير النار
ولا هنحقق ولا هنحاكم
سبنا وطن ومسكنا ف كورة
مين المظلوم مين الظالم
اللى ّ أعرفة الناس محسورة
اللىّ أعرفة الناس مش لاقية
فرح حقيقى وع المكشوف
زى ما تقول كده دايرة ف ساقية
متغمّية وخايفة تشوف
ولا هيفيدها تروح كاس عالم
ولا يسعدها تنظم فورة
الناس بتموت ما تحسوا يا عالم
كرهوا الحق وعشقوا الكورة
فيها إية يعنى تفوز أمريكا
يا اللىّ بكيتوا عشان الكورة
لعبم بيا ولعبم بيكا
صح النوم يابلد مذكورة

الاسكندرية
2009

الناس نايمين....!!

قالوا سعادتة لمّ عصابتة
وبكرة الصبح خلاص جايين
جايين فين......جاى لمين
جاى لمين والناس نايمين..؟

قالوا الشعب العربى بحاله
علما ونبها... وفقها وجهلا
قالوا الشعب العربى بحاله
حتى عياله .........!
فرحتوا مش سيعاها الدنيا
فرحتوا زى ما تقول حاجة تانية
أكبر م إنتصارات أكتوبر
وأكبر من فتوحات حطين
أصل سعادتة لمّ عصابتة
وبكرة الصبح خلاص جايين
جايين فين ........حطين مين
حطين مين والناس نايمين

عدا الليل والشوق جوانا
خلق بتلبس ناس عريانة
ناس فرحانة وناس حزنانة
ناس بتطاوع ناس حرنانة
ناس ترتيبها ما بين لتنين
أصل سعادتة لمّ عصابتة
وبكرة الصبح خلاص جايين
جايين فين......ترتيب مين
ترتيب مين الناس نايمين

شوفت الكل حابس أنفاسه
شعب بكامل هيئة ناسة
خافض راسة رافع راسة
محكوم حاكم أو حراسة
فى إستقبال وفد السلاطين
أصل سعادتة لمّ عصابتة
وبكرة الصبح خلاص جايين
جايين فين ..وسلاطين مين
سلاطين مين إحنا السلاطين

جالنا وزى ما قال فى ميعاده
كل من أكلنا عشقوا وداده
قالوا متواضع واما أشادو
كل الناس زادوا وأفادو
انة شبية حبيب الملايين
يشبة مين....ملايين مين
ملايين مين والناس نايمين

زوقوا كل بلادنا عشانة
غسلوا شوارع سنة قدامة
هيّ دى مصر اللّى ف أحلامه
تمنين مليون فى إستقبالة
أفرح يابن الحاج حسين
تمنين اية..مليون مين
وحسين مين والناس نايمين

جوه الجامعة حشود أبو لامعة
وقفوا صفوف علشان السمعة
دخل الباشا وناسة الطامعة
ألقى سلامه ودمع دمعة
كل الواقف والقاعدين
أصل سعادتة سلامه مؤثر
ومتنساش جده أسمة حسين
بتقول اية...وحسين مين
وسلام مين والناس نايمين

حضر نفسه وقام يتكلم
جاب م الآخر بعد ما سلّم
مش علشان كان جدى انا مسلم
راح أتلجم..........
أو أبقيكم على ناس حبها جوه معلم
فإصحوا وفوقوا .......
بلاش نتكلم فى فلسطين
يصحوا لمين يصحوا لمين
يصحوا لمين الناس نايمين

قال وبقولها كلمة صريحة
حتى إن كانت دولة قبيحة
إحنا أخدنا شعوبكوا طريحة
من ترابورا ......لحد أريحا
فأعقلوا شوفوا بتكلموا مين
نعقل لية......يعقلوا مين
يعقلوا مين والناس نايمين

كل تلت كلمات أبو ليفة
يسمع م الحاضرين تصقيفة
بس الحق ابن الحريفة
جرى ع السلم جريا ظريفة
ورفع صوبع م الكفين
طب جة لية....نفهم اية
يفهموا مين.........
يفهموا مين الناس نايمين

القاهرة
2009

شرفتنا......

جاى للعراق..............
حامل هدايا الخونة جوة شنطتك
دولارات ورق..........!
ونسيت ملايين البشر ......ماتت عرق
ماتت غرق..........مات إتحرق
من يوم مشيتلها سكيتك.........!
رحلة أخيرة ومنتظر منا نودع بالورود
أويضربولك طلقتين وانت مغادر ع الحدود
أو يهتفولك ميت نشيد
يا أيها الملك العنيد.............
شرفتنا وقتلتنا أسعدنا جداً دبحنا..!
ويااااااااااااااااااارب تفتكر اننا
كنا حبايب من زمان
ومع السلامة وبكرة ترجع
تانى أقوى مما كان
وإتأكد ان ليك مكان ...
فى ننا...........فى قلبنا
طول ما احنا أصحاب بعضنا
يفضل فى قلبنا ليك مكان
يا أيها الملك العنيد
نورتنا...............
مستنينك تيجى تانى تودنا
تقتل ملايين من جديد
وسعتها نهتف كلنا
عاد الملك .........
ابن الملك..........
يحيا الملك.........
ابن الملك.........
م احنا شعوب متعودة
على الهتاف وعلى النشيد
احنا شعوب لا تتحكم
إلا بنار أو بالحديد......!!!

الأسكندرية
2009

بلا أناشيد........

طلعوا الحبايب جثث
من كل بيت توابيت
طالعة مع مجدها
متشالة ع الكتاف....
ماضى الولاد الجثث
براويز تغطى الحيط
وكفاح سنين يا قدس
وشعوب عرب بتخاف..!
ياقدس بلا أناشيد
ومقدمات وخطب......
فيه كلمتين للة ناوى أقولهملك
هما........( البقاء للة).
مات الغضب فى العرب
وإنتى اللى باقية
وآآآآآآآآآآآآآآآة....
ع اللى بقى يحبك.....

القاهرة
2009

فى كل يوم...........

فى كل يوم .....
أفتح إيديا وأمدها
وأطلب مدد القانا ناقصين..
......(فى العدد)
فى كل يوم.......
الموت بيخطف مننا
بنت.... وولد
فلذة ....كبد
زرع ...إتولد
فرحة.... بلد
فى كل يوم.......
الموت بيحيا وسطنا وأمل
يمووووووووووت...!
فى كل يوم.......
طالع تابوت...
ويودع الحى بسلام
وإحنا نيااااااااااااااام..!
ولسنا رافض للكلام
وعيونا شايفة
الكون تماااااااام...!
ومافيش جلد.......
ولا حد انهان.... وإنجلد
كلة تمام ....كلة تمام
مع إنها... فى كل يوم
من ع الخريطة ...تزول بلد...!


الاسكندرية
2008

نفوس رخيصة.........

القمر والشمس طالعة
فرق بينهم لحظتين..
والنجوم قايدة ووالعة
والسما مخلوق حزين
والمخبى مش مخبى
المخبى فى الايدين
واللى بكرة منتظرلة
إنكشف قبل الميعاد...
والميعاد كان لسة بدرى
بس دا قدر الولاد...
ضربتين والتانية وقعوا
طلقتين بجنية ونص
موتوا احلام شبابهم....
سكتوا يعنى ماعدشى حس
واللى مش بيحس عاش
واللى حس فى لحظة مات
واللى مات قالوا عنة طايش
واللى طاش فى الخلق فات
قربتنا زمان همومنا
فرقتنا الضحكة لية
إضحك انتة قبل منة
وإنتة خاف م الضحك لية
المعادلة مش عويصة
حلها فى جملتين.......
لية نعيش بنفوس رخيصة
عاجزة مقطوعة الايدين
مد إيدك للى منك...
خد بإيدة .......خطوتين
مهما كان سنة وسنك
كل محتاج...... زقتين
مش مهم إنة.... وإنك
كله له على مصر دين .....

الاسكندرية
2009

لو إعدام.....!

اخويا حبيبى......

اقتلنى بأى سلاح وم تخافشى

لاياخدوا تارى من ولدك

ولا عرضك... ولا ارضك

ودمى يروح م يرجعشى فدا عيونك

دا عمرى دمعه فى جفونك

ولو تمسحها انا راضى .....

وعاشقك حتى لو ماضى

ولو كان قلبك الفاضى

متين قاضى .....

انا مستنى للاحكام

رضيت حكمك .....

رضيت حكمك .....

مسامحك ...........

حتى لو اعدام ....!

القاهرة2004

شبابيكك.......

وبعد سنين

لقيتنى وحيد....!

ومسح الشيب على شعرى

تالت اربع خمس مسحات

فبطلت انى اسهرلك

واسرح فى سبع سماوات

وبطلت انى اعشق مسكه الاقلام

وانزفلك على الجوابات

وحرمت اترهن قدام شبابيكك

او العتبات ........

اميره قصرنا الابيض

يامستنيه يجى امير

وينزل من سبع طبقات

على حصانه اللى شبه الطير

ما تستنيش.......

سبينى لحد تانى اعيش

مانيش ليكى ... ماليش فيكى

انا مرسل من الماضى

وجاى لجل اعزيكى

فشدى الحيل.........

أميرك مات

أميرك مات ...!

الأسكندرية 2000

غمزيتلى وقالت....

بنتى سألتنى

عن معنى ( ديليفرى ) ..؟

وعن ( تيك اوى )...؟

ف جاوبت دا رجس

من فعل شيطان ........

سألتنى عن سر الحزن المتأصل

ف عيونى وعين كل الخلان ....؟

انا قلت عشان ..

جه نص الشهر............

سألتنى....

عن سر مقاطعتى ( ماك وصل )

عن عقلى وعن ماذا توصل ..؟

فكرى لحلول او حتى وعود

انا قولت يا بنتى كفى الله الشر

لا يميها عشان نرسى على البر

غمزيتلى .......

وقالت:( للصبر حدود )

القاهرة2001

مش كفاية...؟

كل يوم اقعد افكرفى اللى فات......

كل يوم تسقينى نارك

لما تنسى الذكريات

وابقى فاكر بس وحدى..........

وانتى ناسيه.............

زى ما اكون عشت وحدى

زى ماتكونى صبحتى ف لحظه قاسيه

ايه جرى لك امتى تفتكرى البداية

ولا دى هيَّ النهاية

مش كفايه.......؟

القاهرة2000

مهوش طالع......!

فى كل ميدان حصان واقف وفوقه همام

فى جنبه طبنجه والتانى ماسكله سفين

وكرباج م السودان وارد لشعب حزين

بقلنا كتير يامحروسه على دا الحال

ولسه حياتنا معكوسه ولسه عيال

بيورثوا كل شىء لينا................

. يسلموا بعض احلامنا.. واحزنا.. واولادنا.. وامانينا

ومراكبنا وطيرنا اللى ف سما المينا

ياميه نيلى عطشان التراب لكن نبوعك

فين................
ياتمر نخيلى ليه جوع الولاد باين ف نن

العين..............

وشايفين البلح طالع على المركب

مسافر زى احلامنا ومش راجع

ياضلمه ليلى م تقولى النهارامتى

ياضلمه ليلى م تقولى النهار امتى

سألنى عجوز بتصرخ ليه...؟

فقلت له جرحها واجع

وصرخى العالى

دا نابع من اللى انا فيه......

. فضلت أصرخ...............

يا ضلمه ليلى م تقولى النهار امتى

يا ضلمه ليلى م تقولى النهار امتى
فرد عجوزى ريحنا ياواد انته
مهوش طالع.............!
اسكندريه 2004

تليغـــرافـــات....

* تليغراف1

عبله البشر ما بقاش بشر
وأنا عنترك......
ما بقتش قادر أسهرك يوم السفر..!

................................

* تليغراف2

سلمت ليك البدن والنفس والعله
والحلم والأمنية
والحيلة والذكرى.......
صبيت دموع على عرق
خايف ما تقبلنى .......
م أنا خطوه ماشيه بقلق
راجعه لورا مرة
ومرة بتسبقنى............

...............................

* تليغراف3

إنت عارف .......
إنى عارف .......
ما تحاولش تلف بيّا
مستحيل نعمل تعارف
وإحنا عارفين الضحية...!!

...............................

* تليغراف4

أنا وإنت............
وسيف مكـــــ ــسور
بنتراهن ونتمنظر
على مين راح يبات
منصور........
ومين يخسر......

.................................

* تليغراف5

إياك تقول الزمن
والناس وأوجاعك
بكره اللىّ كان أشترى
هو اللىّ
هيبيعك .......!!
فتش على علّتك
على ذله
فى طباعك........
واأكتب.........
أكتب..........
وخلى القلم ينطق مواجيعك......

................................

* تليغراف6

يا أبويا....
يا إيدى....
يا ضهرى... وزادى
يا ناقش حروفى
فى صفحة ميلادى...
ياسيدى... يا عيدى
يا دم ف وريدى
بتضحك وأنا أفرح
ويوم لما تحزن
بعيشلك ........حدادى

....................................
*1أسيوط1991
*2الأسكندرية 1996
*3القاهرة1996
*4القاهرة1999
*5القاهرة 2000
*6القاهرة2000

لسه شايفك.......

كل ما أفتكرك بدارى حزنى
لتشوفة العيون....
وأبقى وحدى بس دارى
باللىّ فيا من جنون...
كنتى عندى أغلى منى
كنتى كونى...
كنتى داء مالهوش دواء....
كات حياتك ...
زى ما قولتى بدونى
هى والموت ع السواء
كنت أصدق...!!
كنت تاية فى الخلا
والحلم لبيض..
كنت بغرق...!!
واما شد الموج عليّا
قولت: أفكر...
لية فى يوم ما بتبعدينى
بقرب أكتر....؟
والحكاية مش عويصة
مش عليكى متدارية
كل ما فى الأمر إنك
حتى لو كنتى رخيصة
لسة شايفك........
نقطة الضعف اللىّ فيّا...!!!

طرابلس_ليبيا
1993

على الفاضى......

أنا وانت.....
وعيدنا اللىّ مضى
شاهدين على الماضى...
يبات العامل الراضى
بجيب فاضى.......
فى قلبة حب وموده
يبات يحلم بأمنية...
يعبى فى عيدة جيب فضة
وجيبة التانى ترقية.......
عشان م يعيش
كما الزارع امانينا
ويجنى ثمار سنة فاتت......
عشان ما يقولش كما روحنا
كما جينا...........
ولا جابت ولا سابت
لابد انة.........
يشوف من صنعتة سعده
ولا نشوفة...........
يبات يشكى........
لطوب الارض يوم عيده
يقول: معقول أبات أحلم
وكام ملطوش ما بيزيدوا
يبات الفنى متحنى
بشحم المكنة والرايش......
يقول: يا بلادى مستنى
فى قلبى
عيارك الطايش........
وحابس دمعى وبغنى
بلادى بروحنا ضحينا
بنبض القلب ورضينا
بصوتنا الصافى
ضحكّنا.....
وهيصنا....
وغنينا....
وصقفنا.....
وصقفنا على الفاضى
أنا وأنت...........

القاهرة1999

حقيقه...........

إتولدت......
وصوتى شرفى
م إتولدتش باستكانه
واللى شوفته
عندى يكفى
يا حبيبتى ......
م إتخلقتش للمهانه
يا حبيبتى .......
صدقينى ...
م إتهزمتش لجل ضعفى
وإتهزمت أنا......
بالخيانه....!!!

القاهرة 2000

صعلكه......

عجايب.......!!!
أحبك... وأنام فوق رصيفك وهو
يغشك... ويلبس حريرك بقوة
أصونك........ يخونك
أجوع...... تملى بطنه
أصارحك....... يخبى
وأبقى غريبك... وتبقى له وطنه
وأبكى تزيدى آلامى وجراحى
وأحفظ نشيدى... يشكك كفاحى
بكونلك حبيبك وأموتلك عشانك
يكونلك غريمك وتبكى فراقه
وأفارقك... وترضى
يفارقك..... تموتى
وأزرع ف وردى
ويبدر لى شوكى
تغّلى فى سعره..
وأرخص يا منى
وأصبح تابع لة
وجرحى تابع لى
حبيبتى .........
فى حبك أكلت الزقوم
وهو ما شافه ....
أقولك ايه تانى ...
أقولك....... يدوم

مصراته_ليبيا1991