متأمنين بالجهل...
سمعاً وطاعاً آميين
أأمر يجيلك سهل
وإن كان ف قلب البير
ولا فى سابع ارض
عساكر السلاطين
الأمر عندها فرض
حالاً فى نفس التوو واللحظة
بيطيعوا.................!
اضرب يا دفعة يا بوو
يضرب سى بلابيعوا
ولا فهم ولا تفكير
ده الأمر ظباطى
طير هاتلى ده بيطير
وكأنه وطواطى..!!!
بعكوك وعكه مريع
بالغاز ومطاطى
على طلق حىٌ يذيع
وبيانه كان واطى
قتلوا الولاد بالكوم
دهس وغازات وبارود
والظلم دولته يوم
والحق ماله حدود
نفذ يا نمرة الأمر
نفذ وع المكتوم
وحصد ريحان العمر
وبكى وعمل مظلوم
والشهدا صبحوا مئات
وكأنهم قرابين.....!!
يجى ربعميت فتى مات
وبنات من الواعيين
وكبيرنا مش قلقان
قاعد ومتريس...
وبقية البلدان بتقولوا
يااااااااااا ريس
إرحل عشان الناس
طلعت ومش راجعه
وراسه ميه ترباس
ليكمل الفاجعه...!!!
ف إيديه اليمين تعبان
كشر عن انيابه
نصبوا الفخوخ ألوان
هو واصحابه
فتحوا السجون للكل
إفراج عشان البيه
شاف إنكم ناس فل
لجلن نبوس رجليه
ونعرف إنه الحما
وف الأمن ماله مثيل
ونلعن ابو حلمنا
ونخاف على الباقيين
حلٌق يا عم وحوش
مساجين بتتسرسب
وبلطجيه وحوش
عماله بتهلٌب
ولا حد بيغيت حد
وبلدنا ع البحرى
مفتوحة من غير سد
قبلى على بحرى
لكن الشباب ابطال
عايشين بروح واحده
ولاسألوا فى الطبٌال
ولا واحدة ع الواحدة
ولا همهمش حصان
ولا اللى كان راكبه
ولا واد بفكر حمار
كان ده آخر كارته
صمدوا صمود بلا حد
شهدا ف كل طريق
بالدم سقيوا الورد
ولكل مخرج ضيق
والجالس المرتد
لسه عابد قهره
مدى ودانه لحد
هيجيبوا على ضهره
ده لو حجر وأصم
كان حس بأوجعنا
يااااااااااااارب
زيح الهم شتتهم
وجمعنا.......
القاهرة
2011
