طلع البيان...
سقط النظام...
وإتنحى فرعون وإختفى من ع الشاشات
وماعاد يبان.........
وإتلجموا كل التعالب والديابة والحيتان
وإتنفس الشعب اللى خنقوا الغاز
على حدود الميدان
وإرتاح شهيد الرشاشات
نام مطمئن خلاص وصل بينا
الأمان..........
سقط النظام..........
اللى سقانا المرٌ فى ثلاثين سنة
كانت كبيسة........!
سقط اللى حرقوا جلدنا
سقطوا اللى عضوا ف لحمنا
سقطوا اللى مصوا ف دمنا
رحل اللى فاكر شعبنا
سهل وفريسة..!!
طلع البيان ....
سقط النظام ....
صعد الكرام ....
صعدوا اللى منا ومنكم
صعدوا اللى شالوا همكم
صعدوا اللى هتفوا بإسمكم
يسقط رئيسنا المستبد وشلتة
الخاينة ..... الخبيثة
سقط النظام.......
إتفك سرج البغل فوقع ع الرصيف
واد مش نضيف واد مش شريف
مأجور وفاكر يطفى نور الشمس
بحمارة الكفيف
قابض خيانتة كام جنيه
دفعوها رجالة نظيف
ونظيف كفيف
معرفش إن الثورة نور
والثورة نار
معرفش إن لابد يوم يطلع نهار
يمحى دموع الظلم ف عيون الشريف
سقط النظام.......
سقطوا اللى كانوا يطبلوا
وبيرقصوا يوم النزيف
سقطوا اللى خانوا شعبنا
سقطوا اللى بوٌروا زرعنا
سقطوا اللى دبٌحوا حلمنا
رحل العنيد المفترى
مذلول ضعيف
طلع البيان ... طلع الربيع
واتفتحت كل الورود
من بعد يجى ثلاثين سنة
كانت خريف....!!
طلع الربيع .... منظر بديع
نوٌار ف عز العمر
قالوا : حقنا إزاى يضيع
ضحوا بروحهم ثاروا ع الوضع الوضيع
نجح الولاد فى الامتحان
بعتوا رسالة لكل واحد
لجل ما يعم الربيع
إيدى فى إيدك يابن بلدى
وأوع منى ف يوم تضيع
مصر اللى كانت يوم بتاعتة
النهاردة للجميع.....
القاهرة
2011
